މަޝްހޫރު ވިޔަފާރިވެރިޔާ މުހައްމަދު ޔޫސުފް (ކުވާ މޮހޮދޭ) މިއަދު ނިޔާވެއްޖެ އެވެ.
އުމުރުން 75 އަހަރުގައި މޮހޮދޭ ނިޔާވީ އައިޖީއެމްއެޗްގެ އައިސީޔޫގައި ފަރުވާ ދެމުން ދަނިކޮށެވެ.
މޫނު ދެއްކުމާއި ކަށުނަމާދު އޮންނާނީ މިރޭ އިޝާ ނަމާދަށްފަހު އިސްލާމީ މަރުކަޒު ގައެވެ.
ހަޔާ އެޑިއުކޭޝަން މިނިސްޓަރު ޑރ. މަރިޔަމް މާރިޔާ އާއި ކުރީގެ އިމިގްރޭޝަން ކޮންޓްރޯލަރު ޑރ. އިބްރާހިމް ޝާފިއު އާއި ކުރީގެ ކޮމިޝަނާ ޖެނެރަލް އޮފް ކަސްޓަމްސް މާނިއު ޔޫސުފަކީ މޮހޮދޭ ކުދިންނެވެ.
މޮހޮދޭ އަކީ ހަތްދިހައިގެ އަހަރުތަކުގައި ރާއްޖޭގައި އެންމެ ބޮޑެތި މުއްސަނދިންގެ ތެރޭގައި ފާހަގަކުރެވުނު ބޭފުޅެކެވެ. ސިޔާސީ ބައެއް މައްސަލަތަކުގައި މޮހޮދޭ ވަނީ ޖަލުގައިވެސް ދުވަސްތަކެއް ހޭދަކުރައްވާފަ އެެވެ.
މޮހޮދޭ ނިޔާވުމާ ގުޅިގެން ރައީސް ޑރ. މުހައްމަދު މުއިއްޒު ވިދާޅުވީ މޮހޮދޭ އަކީ ވިޔަފާރީގެ ދާއިރާއިން ބޮޑެތި ހިދުމަތްތަކެއް ގައުމަށް ކޮށްދެއްވާފައިވާ އަދި ދަރުމަވެރި އެތައް އެހީތަކެއް ވަކިވަކި ފަރުދުންނަށާއި ޖަމާއަތްތަކަށް ފޯރުކޮށްދެއްވާފައިވާ އިހްސާންތެރިއެއް ކަމަށެވެ.
"ގިނަ ބަޔަކު ދަންނަ ރަހްމަތްތެރި ސާދާ މިޒާޖެއްގެ ވެރިއެކެވެ. ހިދުމަތްތެރި ދަރީންތަކެއްގެ ބައްޕައެކެވެ،" ރައީސްގެ ތައުޒިޔާގެ މެސެޖުގައި ވިދާޅުވެފައިވެ އެވެ.