މިނިސްޓްރީ އޮފް އެގްރިކަލްޗާ އެންޑް އެނިމަލް ވެލްފެއާ ހިންގެވުން ވަގުތީގޮތުން މިނިސްޓާ އޮފް ހަޔާ އެޑިޔުކޭޝަން، ލޭބަ އެންޑް ސްކިލްސް ޑިވެލޮޕްމަންޓް، ޑރ. މަރްޔަމް މާރިޔާ އާއި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހަވާލުކުރައްވައިފި އެވެ.
ރައީސް މިގޮތަށް ނިންމެވީ ސިއްހީ ހާލުކޮޅު ހުރިގޮތުން ޑރ. އައިޝަތު ރަމީލާ، މިނިސްޓާ އޮފް އެގްރިކަލްޗާ އެންޑް އެނިމަލް ވެލްފެއާގެ މަގާމުން މިއަދު އިސްތިއުފާ ދެއްވުމާ ގުޅިގެންނެވެ.
ޑރ. ރަމީލާއަށް ކެންސަރު ޖެހިފައިވާ ކަމާއި އެކަން އެނގިވަޑައިގަތީ އެންމެ ފަހު ސްޓޭޖުގައި ހުއްޓާ ކަމަށް އެކަމަނާ ހާމަކުރެއްވީ މިދިޔަ އަހަރުގެ ނޮވެމްބަރު މަހު ސޯޝަލްމީޑިއާގައި ކުރެއްވި ޕޯސްޓެއް ގައެވެ.
ރަމީލާ ގައުމީ ހިދުމަތް ފެއްޓެވީ ނަރުހެއްގެ ގޮތުގައި 1990 ވަނަ އަހަރު އެވެ. މިނިސްޓަރު ކަމާ ހަވާލުވެވަޑައިގަތުމާ ހަމައަށް އެކަމަނާ ހުންނެވީ އެވިޑް ކޮލެޖުގެ އިސް މަގާމެއް ގައެވެ.
ޑރ. ރަމީލާ ސިޔާސީ ގޮތުން ފާހަގަކުރެވިގެން ދިޔައީ ރައީސް އަބްދުﷲ ޔާމީންގެ ވެރިކަމުގައި ހެލްތު މިނިސްޓްރީގެ ސްޓޭޓް މިނިސްޓަރެއްގެ މަގާމަށް އައްޔަންކުރެއްވުމާ ގުޅިގެންނެވެ.