އާ އަހަރާ ދިމާކޮށް ރަޝިއާގެ ރައީސް ލަޑިމިއާ ޕޫޓިންއަށް، ޗައިނާގެ ރައީސް ޝީ ޖިންޕިން ވަރަށް ޚާއްސަ މެސެޖެއް ވޮނުއްވައިފި އެވެ.
ޝީ ޖިންޕިންގެ މެސެޖްގައި ފާހަގަކުރައްވާފައި އޮތް އެންމެ މުހިންމު ނުކުތާ އަކީ، ކުރިއަށް އޮތް އަހަރަކީ ދުނިޔޭގެ ސުލްހައަށް ޗައިނާ ގަދަފަދަ މަސައްކަތްތަކެއް ކުރައްވާނެ ކަމަށް ވިދާޅުވެ ދެއްވާފައި އޮތް ޔަގީންކަމެވެ.
ދުނިޔޭގެ ހާލަތު ކޮންމެ ގޮތަކަށް ބަދަލުވެގެން ދިޔަ ނަމަވެސް -- ދުނިޔޭގެ ސިޔާސަތަށް ބަޔަކު ކިތަންމެ ނުފޫޒެއް ފޯރުވި ނަމަވެސް، އެ ހުރިހާ ވަޔަކާއި އޮޔަކާ ދެކޮޅަށް މަސައްކަތްކުރައްވާނެ ކަމަށް ޝީ ވިދާޅުވި އެވެ.
ކާމިޔާބަކީ މަސައްކަތްކުރާ ބަޔަކަށް އޮތް ހައްގެއް ކަމަށް ވިދާޅުވެ، ޝީ ވިދާޅުވީ ޗައިނާ އޮންނާނީ ސުލްހައަށް ލޯބިކުރާ ރޭހުގައި ކަމަށެވެ.
ދުނިޔެ ސުލްހަވެރި މައިދާނެއް ގޮތުގައި ބާއްވައިގެން ނޫން ގޮތަކަށް ގައުމުތައް ތަރައްގީނުކުރެވޭނެ ކަމަށް ވެސް މެސެޖްގައި ޝީ ވިދާޅުވި އެވެ.
ޗައިނާގެ ވިސްނުމަކީ ބިރުދެއްކުމާއި އަސްކަރީ ތަނަވަސްކަން ދޫކޮށްލައި، ދުނިޔެއަށް އިގުތިސާދީ ބާރުވެރިކަން ގެނައުން ކަަމަށްވެސް މެސެޖްގައި ވެއެވެ.
ޔުކްރޭން ހަނގުރާމަ ފެށުނީއްސުރެ، ޗައިނާ އަކީ ރަޝިއާއަށް ވަރަށް ހެޔޮކޮށް ހިތާ ގައުމެވެ. އަދި އެމެރިކާއިން ރަޝިއާއަށް ދަތިކުރަން ގޮވާލި ގޮވާލުމުގައި ޗައިނާ ބައިވެރިއެއް ނުވެ އެވެ. އޭގެ ބަދަލުގައި ޗައިނާ ފެންނަނީ ރަޝިއާށް ކަމޭހިތައި އަޅާލާ ގައުމެއްގެ ގޮތުގަ އެވެ.
ރަޝިއާ އަކީ ޗައިނާގެ ވަރަށް ގާތް އެކުވެރިއެއް ކަމަށް ޝީގެ މެސެޖުގައި ވެއެވެ. މި ގާތްކަން ތާއަބަދަށް ދެމިއޮތުމަކީ އުންމީދެއް ކަމަށް ވެސް ވަނީ ވިދާޅުވެފަ އެވެ.
ރައީސް ޝީ ޖިންޕިން އާއި ރައީސް ޕޫޓިން އަކީ ޒާތީ ގޮތުންވެސް ވަރަށް އެކުވެރި ދެ ބޭފުޅުންނެވެ. މިހެން ކަން އޮތުމުން ތަރައްގީގެ މިސްރާބުގައި ދެ ގައުމަށް އެއް ވިސްނުމެއްގައި ކުރިއަށް ދެވޭނެ ކަމަށްވެސް ޝީ ވިދާޅުވި އެވެ.
ޗައިނާ އާއި ރަޝީއާގެ އާންމު ގުޅުމަކީ ވިޔަފާރި އެވެ. ރަޝިއާގައި އުފައްދާ ތެޔޮ، ޗައިނާއިން ގަތުމާއި އަދި ރަޝިއާއަށް ބޭނުންވާ ޒަރޫރީ ބާވަތްތައް ފޯރުކޮށްދިނުމުގައި ޗައިނާ ފެންނަނީ އަވަދިނެތި އުޅޭ ތަނެވެ.