ރާއްޖޭގެ ފަތުރުވެރިކަން އިސްތިހާރުކުރަން ކާޓޫން އުފައްދަންޖެހޭ ކަމަށް ރައްޔިތުންގެ މަޖިލީހުގެ އިހަވަންދޫ ދާއިރާގެ ޕީއެންސީ މެންބަރު އަހުމަދު ނަސީރު މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގައި މިއަދު ކުރިއަށްދިޔަ ދިވެހިރާއްޖޭގެ ޓޫރިޒަމާބެހޭ ގާނޫނަށް އިސްލާހު ގެނައުމުގެ ބިލްގެ ބަހުސްގައި މެންބަރު އަހުމަދު ނަސީރު ވިދާޅުވީ ފަތުރުވެރިކަން އިސްތިހާރުކުރަން މިހާރު ގެންގުޅޭ އުސޫލުތައް ބަދަލުކުރަންޖެހޭ ކަމަށެވެ.
ބިލްގެ ބަހުސްގައި މެންބަރު ނަސީރު ވިދާޅުވީ ދިވެހިރާއްޖެއަކީ "ޕެރަޑައިސް" އޭ ބުނެގެން ފުއްދާލެވެން ނެތް ކަމަށެވެ.
"މި ސިނާއަތް އިސްތިހާރުކުރަން ގެންގުޅޭ ވައްޓަފާޅި އަޅުގަނޑުމެން އެބަޖެހޭ ބަދަލުކުރަން. ހަމައެކަނި ފެއާތަކަށް ގޮސް ބަނޑިޔާ ޖަހައިގެން، ލަވަކިޔައިގެން އަދި ދިގު ހެދުންލައި ނަށައިގެންވެސް ނެތް އަޅުގަނޑުމެންނަށް މި ސިނާއަތަށް ދިވެހިރާއްޖެ ވިއްކޭކަށް،" ނަސީރު ވިދާޅުވި އެވެ.
އޭނާ ވިދާޅުވީ "މޯލްޑިވްސް" އޭ ބުނުމުން ގިނަ މީހުންނަށް ނޭނގޭ ކަމަށާއި އެހެންކަމުން އިސްތިހާރުކުރުމުގެ ވައްޓަފާޅި ބަދަލުކުރަން ޖެހޭ ކަމަށެވެ.
"އަޅުގަނޑުމެން އެބަޖެހޭ ކާޓޫން އުދައްދަން އިއްޒަތްތެރި ރައީސް. އަޅުގަނޑުމެން އެބަޖެހޭ ނިމޯ އުފައްދަން. ނިމޯ ބޭނުންކޮށްގެން ދިވެހިރާއްޖޭގެ ކަނޑުތައް ދައްކަން،" އަހުމަދު ނަސީރު ވިދާޅުވި އެވެ.
މަޑަގަސްކަރަ އިސްތިހާރުވީ ކާޓޫނަކުން ކަމަށާއި ކުޑަކުދިންނަށް ގައުމެއް އިސްތިހާރުވުމުން އެގައުމަކަށް ދާން ބައްޕައިންނަށް ޖެހޭނެ ކަމަށް އޭނާ ވިދާޅުވި އެވެ.