ރައްޔިތުންގެ މަޖިލީހުގެ ރައީސްގެ ގެކޮޅު، މުރައިދޫގޭގައި މަސައްކަތްކުރާ މުވައްޒަފުންގެ މައުލޫމާތު ހާމަކުރުމަށް ރައީސުލްޖުމްހުރިއްޔާ ޑރ. މުހައްމަދު މުއިއްޒު އަންގަވައިފި އެވެ.
ރައީސުލްޖުމްހޫރިއްޔާ މުރައިދޫގޭގެ މުވައްޒަފުންގެ މައުލޫމާތު ހާމަކުރުމަށް އެންގެވީ އެ މައްސަލައާ ގުޅިގެން ސަލާމަތީ ހިދުމަތްތަކާ ބެހޭ ކޮމިޓީ -- 241 ކޮމިޓީން ބޭއްވި ބައްދަލުވުމުގައި މައުލޫމާތު ހާމަނުކުރުމަށް ނިންމާފައި ވަނިކޮށެވެ.
މައްސަލައާ ގުޅިގެން މިއަދު 241 ކޮމިޓީން ބޭއްވި ބައްދަލުވުން ވަނީ ސިއްރުކޮށްފަ އެވެ. ކޮމިޓީ ސިއްރުކުރަން އެދިވަޑައިގެންފައިވަނީ އިނގުރައިދޫ ދާއިރާގެ މެމްބަރު އަދި ޕީއެންސީ ޕީޖީ ލީޑަރު އިބްރާހިމް ފަލާހެވެ. މި ހުށަހެޅުމަށް މާމިގިލި ދާއިރާގެ މެމްބަރު ގާސިމް އިބްރާހިމް ވަނީ ތާއިދު ކުރައްވާފަ އެވެ.
"އަވަސް" އަށް އިނގިފައިވާގޮތުން ރައީސްގެ އެންގެވުމަށް އެ ކޮމިޓީން ވަނީ އަލުން މައްސަލައާ ގުޅޭގޮތުން ބައްދަލުވުމެއް ބޭއްވުމަށް ނިންމާފަ އެވެ.
ރައްޔިތުންގެ މަޖިލީހުގެ ރައީސް، އަބްދުއްރަހީމް އަބްދުﷲގެ ރަސްމީ ގެކޮޅުގެ މަރާމާތު ނިމުމުން ބަދަލުވެވަޑައިގަތީ ޖުލައި މަހުގެ ތެރޭގަ އެވެ.
މުރައިދޫ ގޭގައި މަސައްކަތް ކުރާ މުވައްޒަފުންގެ މައުލޫމާތު ހޯދުމަށް ހުށަހެޅީ ރާއްޖޭގެ ނޫހަކުންނެވެ. ނަމަވެސް މަޖިލީހުގެ އިދާރާއިން ބުނީ މުވައްޒަފުންގެ މައުލޫމާތު ހާމަކުރެވޭނީ 241 ކޮމިޓީން ނިންމާ ގޮތެއްގެ މައްޗަށް ކަމަށެވެ.
ރައްޔިތުން މަޖިލީހުގެ ރައީސް ރަސްމީ ގެކޮޅަށް ބަދަލުވެވަޑައިގަތުމަށްފަހު ވަނީ އިތުރު މުވައްޒަފުން ހޯދާފަ އެވެ. ނަމަވެސް މުވައްޒަފުންގެ ޖުމްލަ އަދަދެއް ނުވަތަ މުސާރައެއް ހާމަކޮށްފައެއް ނުވެ އެވެ.
މުރައިދޫގޭގައި އެންމެ އިސް މަގާމުގައި ހުންނަވަނީ މަޝްހޫރު ނޫސްވެރިޔާ މުންޑޫ އާދަމް ހަލީމެވެ. އެއީ ޗީފް އޮފް ސްޓާފްގެ މަގާމެވެ. ދާދި ފަހުން ގެކޮޅުގެ ޑިރެކްޓާ ޖެނެރަލްގެ މަގާމަށް ފުޓްބޯޅަ ކުޅުންތެރިޔާ އަލީ އަޝްފާގް (ދަގަނޑޭ) ވެސް ވަނީ އައްޔަންކުރައްވާފަ އެވެ.
މަޖިލީހުގެ ރައީސުން ދިރިއުޅެއްވުމަށް ގެކޮޅެއް ހާއްސަކުރީ 2021 ވަނަ އަހަރު އެވެ. އެއީ ކުރީގެ ރައީސް މުހައްމަދު ނަޝީދު މަޖިލީހުގެ ރައީސްގެ ގޮތުގައި ހުންނަވަނިކޮށް ބޮމުގެ ހަމަލާއެއްދީ ޒަހަމްކޮށްލުމާ ގުޅިގެން ގެނައި ބަދަލެކެވެ.