މަސްވެރިން ކިރުވާ މަހަށް 48 ގަޑިއިރުގެ ކުރިން މިހާރު ފައިސާ ޖަމާކޮށްދެމުންދާ ކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ) އިން މިއަދު ބުނެފި އެވެ.
މަސްވެރިން އަތުން ގަންނަ މަހަށް 48 ގަޑިއިރުގެ ތެރޭގައި ފައިސާ ދިނުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވައުދެކެވެ.
މިފްކޯގެ އޮފިޝަލަކު މިއަދު ވިދާޅުވީ ރައީސްގެ ވައުދު މިހާރު ބަރާބަރަށް ފުއްދަމުންދާ ކަމަށެވެ. އަދި ބައެއް ހާލަތްތަކުގައި 24 ގަޑިއިރުގެ ތެރޭގައިވެސް ފައިސާ ޖަމާކޮށްދެމުންދާ ކަމަށް ވިދާޅުވި އެވެ.
މި ސަރުކާރު ވެރިކަމާ ހަވާލުވިއިރު މަސްވެރިންނަށް ދޭންޖެހޭ 230 މިލިއަނެއްހާ ރުފިޔާ ނުދީ އޮތެވެ.
ނަމަވެސް ކުޑަ ދުވަސްކޮޅެއްގެ ތެރޭގައި ނުދީ ހުރިހާ ހުރިހާ ފައިސާއެއް ހަލާސްކުރުމަށްފަހު މިހާތަނަށް ދޭންޖެހޭ ހުރިހާ ފައިސާއެއްވެސް މިހާރު ވަނީ މަސްވެރިން ދީފައި ކަމަށް އޮފިޝަލް ވިދާޅުވި އެވެ.
އޭނާ އިތުރަށް ވިދާޅުވީ މަސްވެރިންނަށް ވީހާވެސް އަވަހަށް ފައިސާ ލިބޭނެ ގޮތް ހަމަޖެއްސުމަށް ބޭންކް އޮފް މޯލްޑިވްސްއާއި، ފިނޭންސް މިނިސްޓްރީއާއި ފިޝަރީޒް މިނިސްޓްރީގެ ފަރާތުން ވަރަށް ބޮޑު އެހީތެރިކަމަކާއި އެއްބާރުލުމެއް ލިބެމުންދާ ކަމަށެވެ.
މަސްވެރިން ބާނާ މަހަށް 48 ގަޑިއިރުގެ ތެރޭގައި ފައިސާ ޖަމާކޮށްދޭން ފެށީ މިއަހަރުގެ މަސްވެރިންގެ ދުވަސް -- ޑިސެމްބަރު 10 އަކާ ގުޅުވައިގެންނެެވެ.