މެދުތެރޭ އެމެރިކާގެ ގައުމެއް ކަމަށްވާ ޕެނަމާގައި، ޕެނަމާއަށް ނިސްބަތްކޮށް ހަދާފައި އޮންނަ ޕެނަމާ ކެނަލަކީ ކޮންޓޭނަރު ބޯޓު ދަތުރުކުރާ މަގެކެވެ. މިއީ އެޓްލާންޓިކް ކަނޑާއި، ޕެސިފިކް ކަނޑު ގުޅުވައިދޭ ކުރު މަގެކެވެ.
ޕެނަމާ ކެނަލްގެ ސަބަބުން މުދާއުފުލާ އާގުބޯޓުފަހަރު، އެ ނޫން ގޮތެއްގައިނަމަ ދަތުރުކުރަން ޖެހޭ ދިގު މަގު ވަރަށް ބޮޑަށް ކުރުކޮށްދެ އެވެ.
އެމެރިކާގެ އިންތިހާބީ ރައީސް ޑޮނަލްޑް ޓްރަމްޕް ދެކެވަޑައިގަންނަވާ ގޮތުގައި ޕެނަމާ ކެނަލް މިހާރު ބޭނުންކުރަނީ ވަކި ބަޔަކަށް މަންފާވާ ގޮތަށެވެ.
ޕެނަމާގައި ސަރުކާރާ ހަވާލުވެ ތިބި ބައެއްގެ ސިއްރު އެޖެންޑާގައި އެމެރިކާއަށް ޖެއްސުން ކުރުމުގެ ރޫހު އޮތް ކަމަށް ޓްރަމްޕް ވިދާޅުވި އެވެ.
އޭނާ ވިދާޅުވި ގޮތުގައި ޕެނަމާ ކެނަލަކީ ބައިނަލްއަގްވާމީ ކަނޑު ހުރަހެކެވެ. މި މަގުން ދަތުރުކުރާ ކޮންމެ ބަޔަކާ މެދު އަމަލުކުރެވެން ޖެހޭނީ އެއް އުސޫލަކުން ކަމަށް އޭނާ ވިދާޅުވި އެވެ.
ޓްރަމްޕް ވިދާޅުވީ ޕެނަމާ ކެނަލް ހުރަސްކޮށް ދަތުރުކުރާ އެމެރިކާގެ ބޯޓުފަހަރުން ބޮޑު ޓެކުހެއް ނަގައި އަދި އެއަށް ވުރެ ކުޑަ ޓެކުހެއް ޗައިނާ ފަދަ ގައުމުތަކުން ނެގުމަކީ އަދުލުވެރިވުން ނޫން ކަމަށެވެ.
ޕެނަމާއަށް އިންޒާރު ދެއްވައި ޓްރަމްޕް ވިދާޅުވީ ޕެނަމާ ކެނަލް ހިންގަން ޖެހޭނީ ހަމައެކަނި ޕެނަމާއިން ކަމަށާއި ޗައިނާ ފަދަ ގައުމެއްގެ ނުފޫޒު އޮވެގެން ނުވާނެ ކަމަށެވެ. އަދި އެމެރިކާގެ ބޯޓުފަހަރުން ނަގާ ޓެކްސް ބޮޑުކުރާ ނަމަ، އަސްކަރީ ބާރުގެ ބޭނުންކޮށްގެން ނަމަވެސް ޕެނަމާ ކެނަލް އަތުލަން ޖެހިދާނެ ކަމަށް އިންޒާރު ދެއްވި އެވެ.
ޓްރަމްޕް ވިދާޅުވި ގޮތުގައި ޕެނަމާ ކެނަލް ބިނާކުރުމުގައި އެމެރިކާއިން ވަރަށް ބޮޑު ހޭދައެއް ކުރި އެވެ. އަދި އެ މަސައްކަތުގައި އުޅެނިކޮށް އެމެރިކާގެ އެތައް ބަޔަކު މަރުވި ކަމަށްވެސް ވިދާޅުވި އެވެ.
ޕެނަމާ ކެނަލް އެންމެ ގިނައިން ބޭނުންކުރަނީ އެމެރިކާ ކަމަށް ވިދާޅުވެ ޓްރަމްޕް ވިދާޅުވީ އެމެރިކާއާ މެދު އަދުލުވެރި ނުވާނަމަ ސީރިއަސް މައްސަލައެއްގެ ގޮތުގައި އޭނާގެ ސަރުކާރުން އެކަން ބަލާނެ ކަމަށެވެ. އަދި އެކަމުގައި އެމެރިކާއަށް ފައިދާ ބޮޑު ގޮތަކީ ކެނަލް އަތުލުން ކަމަށްވާނަމަ، އެކަން ކުރަން ޖެހިދާނެ ކަމަށްވެސް ވިދާޅުވި އެވެ.