ސިވިލް ސާވިސް ކޮމިޝަން (ސީއެސްސީ)ގެ މުވައްޒަފުންނަށް ޖާސޫސް ކުރި ކަމަށް ތުހުމަތުކުރެވޭ އެ ކޮމިޝަންގެ ދެ މުވައްޒަފުންގެ ސަސްޕެންޝަންގެ މުއްދަތު އިތުރުކޮށްފި އެވެ.
ސީއެސްސީގެ ބައެއް މުވައްޒަފުންގެ ފަރާތުން އަވަސްއަށް އެނގިފައިވާ ގޮތުގައި ސަސްޕެންޑް ކޮށްފައިވަނީ ސީއެސްސީގެ އައިޓީ ޑިޕާޓްމަންޓު ހެޑް އަދި ކޮންސަލްޓެންޓެވެ.
މި ދެ މީހުން އެއް މަސް ދުވަހަށް ފުރަތަމަ ސަސްޕެންޑް ކުރީ މިދިޔަ ނޮވެމްބަރު މަހުގެ 21 ވަނަ ދުވަހު އެވެ. އަދި ޖެހިގެން އައި ދުވަހު މި ދެ މީހުންގެ މައްސަލަ ވަނީ ފުލުހުންނަށް ހުށަހަޅާފަ އެވެ.
ތުހުމަތު ކުރެވޭ ދެ މުވައްޒަފުންގެ މުއްދަތު ހަމަވުމާ އެކު މިހާރު ވަނީ އިތުރު އެއް މަސް ދުވަހަށް ސަސްޕެންޑްކޮށްފަ އެވެ. މިފަހަރު ދެ މުވައްޒަފުން ސަސްޕެންޑް ކުރީވެސް މުސާރަ ނުލިބޭ ގޮތަށެވެ.
އަވަސްއާ މީގެކުރިން ވާހަކަދެއްކި ސީއެސްސީގެ ބައެއް މުވައްޒަފުން ބުނީ ސަސްޕެންޑް ކުރި ދެ މުވައްޒަފުން އެ ކޮމިޝަންގެ މުވައްޒަފުންނަށް ޖާސޫސް ކުރީ ކޮމިޝަނުގައި ބޭނުންކުރާ "ވިއުގަ" ސޮފްޓްވެއާއަށް އަންނަ ހަމަލާތަކުން ރައްކާތެރިކޮށްދޭ އެއްޗެއް ކަމަށް ބުނެ ކޮމިޝަންގެ މެމްބަރުންނަށް އޮޅުވާލައިގެން 2022 ވަނަ އަހަރުގެ އޭޕްރީލް މަހުގެ ތެރޭގައި ގަނެފައިވާ ސޮފްޓްވެއާއެއް ބޭނުންކޮށްގެންނެވެ.
ނަން ނުޖެހުމަށް ޝަރުތުކޮށް ސީއެސްސީގެ މުވައްޒަފަކު ބުނީ މިކަމެއް ހިނގާތާ ދެ އަހަރު ވެދާނެ ކަމަށެވެ. އެކަމަކު މިމައްސަލަ ފެންމަތިވީ މިދިޔަ ނޮވެމްބަރު މަހުގެ ތިންވަނަ ހަފްތާ ތެރޭގައި ކޮމިޝަންގެ ރައީސް މުހައްމަދު ނާސިހުގެ މައްސަލައެއް މަޖިލީހުގެ ކޮމިޓީއަކުން ބެލި ބެލުމުގެ ތެރެއިން ކަމަށްވެސް ބުންޏެވެ.