ސިވިލް ސާވިސް ކޮމިޝަން (ސީއެސްސީ)ގެ ރައީސް މުހައްމަދު ނާސިހް މަގާމުން ވަކިކުރަން ރައްޔިތުންގެ މަޖިލީހުން ފާހެއްނުވި އެވެ.
ނާސިހް ވަކިކުރުމާއި ގުޅޭ ގޮތުން ރައްޔިތުންގެ މަޖިލީހުގައި މިއަދު ނެގި ވޯޓުގައި އޭނާ އެ މަގާމުން ވަކިކުރަން ނުފެންނަ ކަމަށް 64 މެންބަރުން ވޯޓު ދެއްވިއިރު ވަކިކުރަން ފެންނަ ކަމަށް ވޯޓު ދެއްވީ 12 މެންބަރުންނެވެ. ވަކި ކޮޅަކަށް ވޯޓު ނުދެއްވާ ދެ މެންބަރުން ތިއްބެވި އެވެ.
އޭނާ ވަކިކުރަން ހުށަހެޅީ ސީއެސްސީގެ މަސްއޫލިއްޔަތުތަކާ ހިލާފަށް މަސައްކަތްކޮށްފައިވާ ކަމަށް ތުހުމަތުކޮށެވެ.
އެ މައްސަލަ ދިރާސާކުރުމުގެ މަރުހަލާގައި އެފަދަ ކަމެއް ސާބިތުވެފައިނުވާތީ އޭނާ މަގާމުން ވަކިނުކުރުމަށް މައްސަލަ ދިރާސާކުރި މަޖިލީހުގެ މިނިވަން މުއައްސަސާތަކުގެ ކޮމިޓީން އިއްޔެ ފާސްކުރި އެވެ.