ބައެއް މިނިވަން މުއައްސަސާތަކުގެ ބައެއް މެންބަރުން ވަކިކުރަން ނިންމާފައިވަނީ ނުފޫޒަށް ލެނބުމާއި ސުލޫކީ މައްސަލަތަކަކާ ގުޅިގެން ކަމަށް މިނިވަން މުއައްސަސާތަކާ ބެހޭ ކޮމިޓީން މިއަދު ބުނެފި އެވެ.
މިނިވަން މުއައްސަސާތަކުގެ ކޮމިޓީގެ ތުހުމަތު ހާމަކުރީ އެ ކޮމިޓީން ރައްޔިތުންގެ މަޖިލީހުގެ ރިޔާސަތަށް ފޮނުވި ސިޓީ މަޖިލީހުގެ މިއަދުގެ ޖަލްސާގައި އަމީންއާންމު ފާތިމަތި ނިއުޝާ އިއްވެވިއިރު އެވެ.
މިނިވަން މުއައްސަސާތަކުގެ ކޮމިޓީން ވަނީ އޭސީސީގެ ނައިބް ރައީސް އަބްދުލް ސަލާމާއި އެ ކޮމިޝަންގެ މެންބަރު ތޯހާ މުހައްމަދާއި އީސީގެ ނައިބް ރައީސް އަލީ ނަޝާތާއި އެ ކޮމިޝަންގެ މެންބަރުން ކަމަށްވާ މުހައްމަދު އާސިފާއި ޑރރ. މުހައްމަދު ޒާހިރުގެ އިތުރުން ސީއެސްސީގެ ރައީސް މުހައްމަދު ނާސިހްއާ ގުޅޭ މައްސަލައެއް ބަލަން ފަށާފަ އެވެ.
އަމީންއާންމު މިއަދު މަޖިލީހަށް އިއްވި ސިޓީގައިވާ ގޮތުގައި ތޯހާއާއި ސަލާމް ވަނީ އޭސީސީގެ ގާނޫނުގެ 17 ވަނަ މާއްދާގެ (ހ) ގައި އެ ކޮމިޝަންގެ ވާޖިބުތައް އަދާކުރުމުގައި ބިރަކަށް ނުވަތަ ނުފޫޒަކަށް ލެނބިގެން ނުވާނެ ކަމަށް ބަޔާން ކޮށްފައިވާ މާއްދާއާއި އެ މާއްދާގެ (ށ) ގައި އެއްވެސް މައްސަލައެއް ނިންމުމުގައި ނުވަތަ ސިޔާސަތެއް ކަނޑައެޅުމުގައި އަމިއްލަ މަސްލަހަތެއް ހާސިލް ކޮށްގެން ނުވާނެ ކަމަށް ބުނާ މާއްދާއާ ހިލާފަށް އެތައް ކަމެއް ކުރައްވާފައިވާ ކަމަށް ކުރައްވާފަ އެވެ.
އީސީ އާއި ސީއެސްސީގެ މެމްބަރުންނަށް ތުހުމަތު ކުރަނީ ސުލޫކީ ހަމަތަކާ ހިލާފުވި ކަމަށެވެ. އީސީއާއި ސީއެސްސީގެ ގާނޫނުގައި މެންބަރަކު ސުލޫކީ ހަމަތަކާ ހިލާފުވެއްޖެނަމަ މަގާމުން ވަކިކުރެވިދާނެ ކަމަށް ބުނާ ކަމަށްވެސް ސިޓީގައިވެ އެވެ. އެހެންވެ ގާނޫނަށް ރިއާޔަތްކޮށް ނަޝާތާއި، އާސިފާއި، ޑރ. ޒާހިރު އަދި ނާސިހްއާ ގުޅޭ މައްސަލައެއް ކޮމިޓީން ބަލަމުންދާ ކަމަށް ފާހަގަކޮށްފައިވެ އެވެ.
ބައެއް މިނިވަން މުއައްސަސާތަކުގެ ބައެއް މެންބަރުން ވަކިކުރުމުގެ މަސައްކަތް 20 ވަނަ ރައްޔިތުންގެ މަޖިލީހުން ފެށިއިރު ވަކިކުރާ ބޭފުޅުންނަކީ ނިމިދިޔަ 19 ވަނަ ރައްޔިތުންގެ މަޖިލީހުގައި އެމްޑީޕީގެ އަގުލަބިއްޔަތު އޮތް އިރު އެމްޑީޕީގެ ސަރުކާރުން މަޖިލީހަށް ނަން ފޮނުވައިގެން މަޖިލީހުން ރުހުން ދީގެން އައްޔަންކުރެއްވި ބޭފުޅުންނެވެ.