ސިވިލް ސާވިސް ކޮމިޝަން (ސީއެސްސީ)ގެ މުވައްޒަފުންނަށް ޖާސޫސް ކުރި ކަމަށް ތުހުމަތުކުރެވޭ އެ ކޮމިޝަންގެ ދެ މުވައްޒަފަކު ސަސްޕެންޑްކޮށް ފުލުހުންނަށް މައްސަލަ ހުށަހަޅައިފި އެވެ.
ސީއެސްސީގެ ބައެއް މުވައްޒަފުންގެ ފަރާތުން އަވަސްއަށް އެނގިފައިވާ ގޮތުގައި ސަސްޕެންޑް ކޮށްފައިވަނީ ސީއެސްސީގެ އައިޓީ ޑިޕާޓްމަންޓު ހެޑް އަދި ކޮންސަލްޓެންޓެވެ.
މި ދެ މީހުން އެއް މަސް ދުވަހަށް މިދިޔަ ބުދަ ދުވަހު ސަސްޕެންޑްކޮށްފައިވާއިރު މިމައްސަލަ މިމަހުގެ 21 ވަނަ ދުވަހު ފުލުހުންނަށް ހުށަހަޅާފައިވާ ކަމަށް ފުލުހުން މައުލޫމާތު ދީފައިވެ އެވެ.
އަވަސްއާ ވާހަކަދެއްކި ސީއެސްސީގެ ބައެއް މުވައްޒަފުން ބުނީ ސަސްޕެންޑް ކުރި ދެ މުވައްޒަފުން އެ ކޮމިޝަންގެ މުވައްޒަފުންނަށް ޖާސޫސް ކުރީ ކޮމިޝަނުގައި ބޭނުންކުރާ "ވިއުގަ" ސޮފްޓްވެއާއަށް އަންނަ ހަމަލާތަކުން ރައްކާތެރިކޮށްދޭ އެއްޗެއް ކަމަށް ބުނެ ކޮމިޝަންގެ މެމްބަރުންނަށް އޮޅުވާލައިގެން 2022 ވަނަ އަހަރުގެ އޭޕްރީލް މަހުގެ ތެރޭގައި ގަނެފައިވާ ސޮފްޓްވެއާއެއް ބޭނުންކޮށްގެންނެވެ.
ނަން ނުޖެހުމަށް ޝަރުތުކޮށް ސީއެސްސީގެ މުވައްޒަފަކު ބުނީ މިކަމެއް ހިނގާތާ ދެ އަހަރު ވެދާނެ ކަމަށެވެ. މިމައްސަލަ މިވަގުތު ފެންމަތިވީ މިދިޔަ ހަފްތާގެ ތެރޭގައި ކޮމިޝަންގެ ރައީސް މުހައްމަދު ނާސިހުގެ މައްސަލައެއް މަޖިލީހުގެ ކޮމިޓީއަކުން ބެލި ބެލުމުގެ ތެރެއިން ކަމަށްވެސް ބުންޏެވެ. އެހެންވެ މުވައްޒަފުންނަށް ޖާސޫސްކުރާ ކަން ސީއެސްސީގެ ރައީސް ކުރިންވެސް އެނގިވަޑައިގަންނަވާ ކަމަށް ބައެެއް މުވައްޒަފުން ތުހުމަތު ކުރެ އެވެ. ނަމަވެސް ނާސިހް ވަނީ އެ ތުހުމަތުތައް ދޮގުކުރައްވާފަ އެވެ.
"މި ސޮފްޓްވެއާގެ ނުރައްކާ ކަމަކީ އެ މީހުން މި ސޮފްޓްވެއާ އެބަހުރި ހުރިހާ ސިސްޓަމަކަށް އަޅާފައި. އެހެންވެ ސިސްޓަމުން ކުރާ ކޮންމެ ކަމެއް އަދި ސިސްޓަމްގައި ޖަހާ ކޮންމެ އެއްޗެއްގެ ހުރިހާ ޕާސްވޯޑެއްވެސް އެމީހުންނަށް އެނގޭ. މިއީ ކިހާ ނުރައްކާ ކަމެއްތޯ. އަޅުގަނޑުމެންގެ އަމިއްލަ އެކައުންޓްތަކުގެ ޑީޓެއިލް ހޯދައިގެން ނުކުރަނީ ކޮން ކަމެއް ކަމެއްވެސް ނޭނގޭ،" ކަންބޮޑުވެފައި ހުރި މުވައްޒަފަކު ބުންޏެވެ.
މަޖިލީހުގެ މިނިވަން މުއައްސަސާތަކުގެ ކޮމިޓީން ނާސިހްގެ މައްސަލައެއް ބެލި ނަމަވެސް އޭނާ މަގާމުން ވަކިކުރުމަށް ކޮމިޓީއަކަށް ނުފެނުނެވެ.