މީލާދީ އާ އަހަރުގެ ފެށުން ފާހަގަކުރުމަށް ކުލަ ގަދަ ހަރަކާތްތަކެއް ބޭއްވުމަށް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) އިން ނިންމައިފި އެވެ.
އެމްއެމްޕީއާރްސީ އިން ބުނީ މީލާދީ އާ އަހަރުގެ ފެށުމާ ދިމާކޮށް "މޯލްޑިވްސް ކަލްޗާ އެންޑް ފުޑް ފެސްޓިވަލް" ގެ ނަމުގައި ދެ ދުވަހުގެ މުއްދަތަށް ހާއްސަ ހަރަކާތްތަކެއް ބޭއްވުމަށް ހަމަޖެހިފައިވާ ކަމަށެވެ.
މި ހަރަކާތްތައް ކުރިއަށްދާނީ މިއަދާއި މާދަމާ ހުޅުމާލޭ ސެންޓްރަލް ޕާކްގަ އެވެ. މިއީ ދިވެހިންނާއި ފަތުރުވެރިންނަށްވެސް ތަފާތު ތަޖުރިބާއެއް ލިބިގެންދާނެ ފެސްޓިވަލްއަކަށް ވާނެ ކަމަށް އެމްއެމްޕީއާރްސީ އިން ބުނެފައިވެ އެވެ.
އެމްއެމްޕީއާރްސީގެ މި އިސްނެގުމަކީ ޓޫރިޒަމް މިނިސްޓްރީ އާއި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އާއި ބިޒްނަސް ސެންޓާ ކޯޕަރޭޝަން (ބީސީސީ) އާއި މާލެ ސިޓީ ކައުންސިލް އާއި ވޭސްޓް މެނޭޖްމަންޓް ކޯޕަރޭޝަން (ވެމްކޯ) އާއި ފުލުހުންނާއި ސިފައިންގެ އިތުރުން މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އާއި ދިރާގާއި އުރީދޫ އާއި މޯލްޑިވިއަންގެ އިތުރުން އޭސް ޓްރެވަލްސް އަދި ގަލްފް އެއާ ގުޅިގެން ކުރިއަށް ގެންދާ ހަރަކާތެކެވެ.
އާންމުންނަށް ވަދެވޭ ގޮތަށް މި ފެސްޓިވަލް ފަށާނީ މިރޭ 8:00 ގަ އެވެ. މި ހަރަކާތުގައި ރާއްޖެއަށް ފަތުރުވެރިއަކު ޒިޔާރަތްކުރާ ދަތުރު ދައްކުވާލުމުގެ ޑްރޯން ޝޯއަކާއި ބޮޑުބެރުގެ ހުށަހެޅުންތަކާއި ދަފި ނެގުން ފަދަ ސަގާފީ ހަރަކާތްތައް އޮންނާނެ އެވެ.
މީގެ އިތުރުން މާދަމާ ހަވީރު 4:00 އިން ރޭގަނޑު 8:00 އަށް މި ފެސްޓިވަލްގައި އާއިލާތަކަށް ހާއްސަ ހަރަކާތްތަކެއް ބޭއްވުމަށް ވަނީ ހަމަޖެހިފަ އެވެ.