މި ސަރުކާރުގެ "ހަފުތާ 52" ގެ ކާމިޔާބީތަކާ ގުޅިގެން މިއަދު ހުޅުމާލޭގައި އާއިލީ ހަވީރެއް ބާއްވަން ތައްޔާރުވެއްޖެ އެވެ.
"ބަދަހި އާއިލާ - އުފާވެރި މުޖުތަމައު" ގެ ނަމުގައި ސޯޝަލް އެންޑް ފެމިލީ މިނިސްޓްރީން ބާއްވާ މި އާއިލީ ހަވީރު އޮންނާނީ މިއަދު ހަވީރު 4:00 އިން އިރުއޮއްސި 6:00 އަށް ހުޅުމާލެ ސެންޓްރަލް ޕާކްގަ އެވެ.
ސޯޝަލް އެންޑް ފެމިލީ މިނިސްޓްރީން ބުނި ގޮތުގައި މި ހަވީރުގެ މަގުސަދަކީ އާއިލީ މާހައުލެއްގައި، އެ މިނިސްޓްރީން ފާއިތުވި އަހަރުގެ ތެރޭގައި ކުރި މަސައްކަތްތަކުން ހާސިލުކުރެވުނު ކާމިޔާބީތައް ރައްޔިތުންނާއި ހިއްސާކުރުމެވެ.
މީގެ އިތުރުން އަންހެނުންނާއި، ކުޑަކުދިންނާއި، ނުކުޅެދުންތެރިކަން ހުންނަ ފަރާތްތަކާއި އިސްރަށްވެހިންނަށް އަމާޒުކޮށްކޮށްގެން ކުރިއަށް ގެންދެވުނު މަސައްކަތްތަކާއި، މިނިސްޓްރީން ފޯރުކޮށްދެމުން އަންނަ ހިދުމަތްތަކުގެ މައުލޫމާތު މި އާއިލީ ހަވީރުގައި ފޯރުކޮށްދޭނެ ކަމަށް އެ މިނިސްޓްރީން ވަނީ ބުނެފަ އެވެ.
މި އާއިލީ ހަވީރުގައި ތަފާތު ގޭމް ސްޓޯލްތަކާއި، ކާބޯތަކެތީގެ ސްޓޯލްތަކުގެ އިތުރުން ތަފާތު މެސްކޮޓްތަކުގެ ހަރަކާތްތައް ކުރިއަށް ދާނެއެވެ.
އާއިލީ ހަވީރުގައި އިސްކޮށް ހަރަކާތްތެރިވާނީ ޓްރާންސްޕޯޓް މިނިސްޓްރީ އާއި ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އެވެ. އޭގެ އިތުރުން އުރީދޫ މޯލްޑިވްސް އާއި މޯލްޑިވްސް ޕެންޝަން އެޑްމިނިސްޓްރޭޝަން އޮފީހާއި ދިވެހި ފުލުހުންގެ ހިދުމަތާއި ނެޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) އަދި ފެމިލީ ޕްރޮޓެކްޝަން އޮތޯރިޓީއިންވެސް މި ހަވީރުގައި ބައިވެރިވާނެ އެވެ.