ކުދިކުދި ކުށްތަކުގައި 100 އަށްވުރެ ގިނަ ފަހަރު ހައްޔަރު ބަންދު ރެކޯޑް އޮތް ނ. މިލަދޫ ސޯސަންގެ މުހައްމަދު ނައުޝާދު ވައްކަމުގެ މައްސަލައެއްގައި އަނެއްކާވެސް ހައްޔަރުކޮށްފި އެވެ.
ނައުޝާދު ބަންދުކޮށް، ކޯޓަށް ހާޒިރު ކުރުމުން އޭނާގެ ބަންދަށް އިސްގާޒީ އާދަމް މުހައްމަދު ވަނީ 15 ދުވަސް ޖަހާފަ އެވެ. ބަންދު އަމުރު ރިޕޯޓުން އެނގޭ ގޮތުގައި ނައުޝާދު ވަނީ އޭނާގެ މައްޗަށް ކުރާ ތުހުމަތުތަކަށް އިންކާރުކޮށްފަ އެވެ.
ނައުޝާދަކީ ކުދި ކުދި ކުށްތަކުގައި 100 އަށްވުރެ ގިނަ ފަހަރު ހައްޔަރު ބަންދު ރެކޯޑް އޮތް މީހެކެވެ.
އާއްމު ޖިނާއީ ނިޒާމުގެ ތެރެއިން މި ފަދަ މީހުން އިސްލާހުވާނެ ކަމަށް ދެކެވަޑައިނުގަންނަވާ ކަމަށް ކްރިމިނަލް ކޯޓުގެ ގާޒީ މުހައްމަދު މިސްބާހު، ކުރިން ވަނީ ނައުޝާދުގެ ބަންދު އަމުރެއްގައި ފާހަގަ ކުރައްވާފަ އެވެ.
ގާޒީ މިސްބާހު ކުރިން ފާހަގަކުރައްވާފައިވާ ގޮތުގައި ނައުޝާދަކީ ތަކުރާރުކޮށް މަސްތުވާތަކެތި ބޭނުންކުރުމާއި ވައްކަމާއި އެ ބާވަތުގެ އެކިއެކި ކުދިކުދި ކުށްތަކަށް އަރައިގަންނަމުންދާ މީހެކެވެ.
"އާއްމު ޖިނާއީ ނިޒާމުގެ ތެރެއިން މިހާރު އަމަލު ކުރަމުންދާ ގޮތަށް ދައުވާކޮށްފައި އަދަބު ކަނޑައެޅިކަމުގައިވީ ނަމަވެސް މިއީ އެފަދަ މީހުން އިސްލާހުވުމަށް ބާރު އެޅޭ ފަދަ އަދަބެއް ކަމުގައި ނުވޭ" ގާޒީ މުހައްމަދު މިސްބާހު ކުރިން ވިދާޅުވެފައިވެ އެވެ.
މިފަދަ މީހުންނަކީ މުޖުތަމައުން އެކަހެރިކޮށް އިސްލާހުކުރުމުގެ ނިޒާމެއްގެ ތެރެއަށް ވެއްދުމަށްފަހު، އިސްލާހުވެ މުޖުތަމައަށް ފައިދާހުރި މަސައްކަތެއް ދަސްކުރުމަށްފަހު އަމިއްލަ ދިރިއުޅުމެއް އުޅެން ތައްޔާރުވުމުން ނޫނީ އަލުން މުޖުތަމައަށް ދޫނުކުރެވޭނެ މީހުން ކަމަށް ދެކެވަޑައިގަންވާ ކަމަށް ގާޒީ އޭރު ފާހަގަ ކުރައްވާފައިވެ އެވެ.