ގައިދީއަކަށް މަސްތުވާތަކެތި ފޯރުކޮށްދޭން އުޅުނު ކަމަށް ފުލުހުން ތުހުމަތު ކުރާ އަންހެނަކު، ކޯޓުން ދޫކޮށްލައިފި އެވެ.
ގައިދީއަކަށް މަސްތުވާތަކެތި ފޯރުކޮށްދޭން އުޅުނު ކަމަށް ފުލުހުން ތުހުމަތު ކުރަނީ އުމުރުން 50 އަހަރުގެ އަންހެނެކެވެ.
އެހެންނަމަވެސް، އެކަމަށް ބާރު ލިބޭ އެއްވެސް ހެއްކެއް ބަންދު މަޖިލީހަށް ހުށަހަޅާފައިނުވާ ކަމަށް ބުނެ އެ އަންހެން މީހާ ދޫކޮށްލީ ކްރިމިނަލް ކޯޓުގެ ގާޒީ އިބްރާހީމް އިހްސާނު އެވެ.
އެއްވެސް ޝަރުތަކާ ނުލައި އެ އަންހެން މީހާ ކްރިމިނަލް ކޯޓުން އިއްޔެ ދޫކޮށްލިއިރު، ރިކޯޑްތަކުން ދައްކާ ގޮތުގައި މި އަންހެން މީހާގެ ކޮއްކޮއެއްގެ މައްޗަށް މަސްތުވާތަކެތީގެ މައްސަލައެއްގައި އުމުރު ދުވަހުގެ ޖަލު ހުކުމެއް އިއްވާފައިވެ އެވެ. އަދި ހަމަ މި އަންހެން މީހާއާއި އާއިލީ ގުޅުމެއް އޮންނަ އެހެން މީހަކު، ގަސްތުގައި މީހަކު މެރި މައްސަލައެއްގައި މަރުގެ ހުކުމެއް އިއްވާފައިވެ އެވެ.
ރާއްޖޭގައި މިހާރު މަރުގެ ހުކުމް ތަންފީޒު ނުކުރާތީ، އެ މީހާވެސް ހުރީ ޖަލުގައި ކަމަށްވަނީ މައުލޫމާތު ލިބިފަ އެވެ.