ކައުންސިލްތަކުގެ ދައުރު މިހާރަށްވުރެ ފުޅާކުރުމަށް ބޭނުންވާ ކަމަށް ލޯކަލް ގަަވަރުމަންޓް މިނިސްޓަރު އަދާމް ޝަރީފް އުމަރު ވިދާޅުވެއްޖެ އެވެ.
ތ. އަތޮޅު ވޭމަންޑޫގެ އިސްރަށްވެހިންގެ މަހާސިންތާ ހުޅުއްވައިދެއްވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން އާދަމް ޝަރީފް ވިދާޅުވީ ސަރުކާރުގެ ފަރާތުން ރައްޔިތުންނާ ހަމައަށް ހިދުމަތްދޭ ކޮންމެ ކަމެއްގައި ކައުންސިލް ތަކުގެ ދައުރު އޮންނަން ޖެހޭ ކަމަށާއި އަދި ބައިވެރިވުން އިތުރަށް ފުޅާކުރަންވެސް ޖެހޭ ކަމަށެވެ.
އާދަަމް ޝަރީފް ވިދާޅުވީ ލާމަރުކަޒީ ނިޒާމު އިތުރަށް ހަރުދަނާ ކުރުމަށްޓަކައި ގިނަ ކަންތައްތަކެއް ސަރުކާރުން ކުރަމުންދާ ކަމަށެވެ. އަދި ކައުންސިލްތަކުގެ ދައުރު ފުޅާކުރުމަށްޓަކައި ލާމަރުކަޒީ ގާނޫނަށް މިހާރުވެސް ބައެއް އިސްލާހުތަކެއް ގެނެވިފައިވާ ކަަމަށްވެސް ވިދާޅުވި އެވެ.
"ކޮންމެ ސަރުކާރަކުންވެސް ގިނަ މަސައްކަތްކަތް ތަކެއް ކުރަމުންދޭ. މި ނިޒާމު ފުރަތަމަ ތައާރަފުކުރެވުނު އިރުގައިވެސް ނިޒާމުގައި ރަނގަޅުކުރަންޖެހޭ އެތައް ކަމެއް ހުރި،" އާދަމް ޝަރީފް ވިދާޅުވި އެވެ.
މިނިސްޓަރު ވިދާޅުވީ ކައުންސިލަރުންނަކީ ރައްޔިތުން ވޯޓުދީގެން ހޮވާފައިވާ ބަޔަކަށްވާތީ ރައްޔިތުންގެ ހައްގުގައި ބަސްބުނެ ގޮތް ނިންމުމުގެ ހައްގު ކައުންސިލްތަކަށް އޮންނަން ޖެހޭނެ ކަމަށެވެ.
"މިހާރު ކޮންމެ ނިންމުމެއް ނިންމާނީ މާލޭގައި މި އޮންނަ މައި ސަރުކާރުން ނޫން،" އާދަމް ޝަރީފް ވިދާޅުވި އެވެ.
މިނިސްޓަރު އިތުރަށް ވިދާޅުވީ އެ ރަށެއްގައި ދައުލަތުން ނުވަތަ ސަރުކާރުގެ ފަރާތުން އަދި ވަކި މުއްސަސާއަކުން ކަމުގައި ވިޔަސް ކަމެއް ކުރުމުގައި ރައްޔިތުންގެ ފަރާތުން ވާހަކަދައްކާ މަޝްވަރާ ކުރަން ތިބޭ ބަޔަކީ ކައުންސިލްތައް ކަމަށެވެ. އެހެންވެ ކައުންސިލްތަކުން ކުރިއަށް ދިއުމަށް ފުރުސަތުތައް ހޯދައިދޭނެ ކަމަށްވެސް ވިދާޅުވި އެވެ.