އެގުރި ބޯޓު ރާއްޖެަށް ތައާރަފު ވެގެން ދިއުމަކީ ކާބޯތަކެތީގެ ރައްކާތެރިކަން ކަށަވަރުކުރުމަށް އެޅޭ މުހިއްމު ފިޔަވަޅަކަށް ވާނެ ކަމަށް ލޯކަލް ގަވަރުމަންޓް މިނިސްޓަރު އާދަމް ޝަރީފް އުމަރު ވިދާޅުވެއްޖެ އެވެ.
އެގްރި ބޯޓު ރަސްމީކޮށް އިފްތިތާހް ކުރުމަށް އިއްޔެ ބޭއްވި ރަސްމިއްޔާތުގައި އާދަމް ޝަރީފު ވިދާޅުވީ އެގުރިބޯޓު ރާއްޖޭގައި ތައާރަފުް ވުމަކީ ކާބޯތަކެތީގެ ރައްކާތެރިކަން ކަށަވަރު ވެދެންދާނެ ތާރީހީ ކަމެއް ކަމަށެވެ.
"މިކަމުގެ ސަބަބުން ރައްޔިތުންގެ ދިރިއުޅުމުގެ ހާލަތަށްވެސް ހެޔޮ ބަދަލުތަކެއް ގެނެވޭނެ،" އާދަމް ޝަރީފް ވިދާޅުވި އެވެ.
މިނިސްޓަރު ވިދާޅުވީ އެގްރި ބޯޓަކީ ރާއްޖޭގެ މާހައުލާ ގުޅޭގޮތަށް ފަރުމާކޮށްފައިވާ ބޯޓެއް ކަމަށާއި، މިބޯޓުގައި ދަނޑުވެރިކަމުގައި އުފައްދާ ބާވަތްތައް ރައްކާތެރިކަމާއިއެކު ބެލެހެއްޓޭނެ ގޮތްތައް ހަމަޖައްސާފައިވާ ކަމަށެވެ. މިބޯޓަކީ އިރުގެ ހަކަތައިން ބޭނުން ކުރާ ގޮތަށް ފަރުމާކޮށްފައިވާ ބޯޓެއް ކަމުގައިވެސް ވިދާޅުވި އެވެ.
އާދަމް ޝަރީފް ވިދާޅުވީ އެގްރޯ ބޯޓުގެ ސަބަބުން ރާއްޖޭގެ ދަނޑުވެރިކަމަށްވެސް އިތުރު ކުރި އެރުންތަކެއް ލިބޭނެ ކަމަށް ގަބޫލުކުރައްވާ ކަމަށެވެ. އަދި ދަނޑުވެރިކަމުން އުފައްދާ ތަކެތި ތާޒާކަމާ އެކު ރާއްޖޭގެ އެކި މަރުކޭޓް ތަކަށް ފޯރުކޮށްދިނުމަށް ވަރަށް ބޮޑަށް ފަސޭހަ ވެގެންދާނެ ކަމަށްވެސް ވިދާޅުވި އެވެ.
އެގްރި ބޯޓަކީ ޖަޕާނު ސަރުކާރުގެ އެހީގައި ޔޫއެންޑީޕީގެ ޕީޑީއެސްއޭއީގެ ދަށުން ފިކްސްއިން މެރިން ޕްރައިވެޓް ލިމިޓެޑުން ބަނދެފައިވާ ބޯޓެކެވެ. މީގެ ދެވަނަ ބޯޓެއް ބަނުމުގެ މަސައްކަތް ކުރިއަށްދާއިރު މިބޯޓްތައް ފަރުމާކުރީ ދިވެހި ފުލުހުންގެ މެރިން ޕޮލިސްއިންނެވެ.