ފާއިތުވި އެއްއަހަރު ދުވަހުގެ ތެރޭގައި 280 އަށް ވުރެ ގިނަ ކައުންސިލާ ބައްދަލުކުރައްވައި ކައުންސިލްތަކުގެ އިތުބާރު ލިބި ގުޅުން ބަދަހިކުރެވިފައިވާ ކަމަށް ލޯކަލްގަވަރުމަންޓް މިނިސްޓަރު އާދަމް ޝަރީފް އުމަރު ވިދާޅުވެއްޖެ އެވެ.
މިނިސްޓަރު އާދަމް ޝަރީފް ވިދާޅުވީ އޭނާ 280 ކައުންސިލާ ބައްދަލުކުރެއްވިއިރު ރައީސުލްޖުމްހޫރިއްޔާ ޑރ. މުހައްމަދު މުއިއްޒު 169 ކައުންސިލާ ބައްދަލުކުރައްވާފައިވާ ކަމަށެވެ.
"މިބައްދަލުވުންތަކުގެ ތެރެއިން ކައުންސިލްތާއި ސަރުކާރާ އޮންނަ ގުޅުން އިތުރަށް ބަދަހިވެގެން ގޮސްފައިވޭ،" މިނިސްޓަރު ވިދާޅުވި އެވެ.
އާދަމް ޝަރީފް ވިދާޅުވީ ކައުންސިލްތަކުގެ ފުދުންތެރިކަމާއި ބާރުވެރިކަން އިތުރުކުރުމަށްޓަކާ ގިނަ މަސައްކަތްތަކެއް ސަރުކާރުން ކުރަމުންދާ ކަމަށެވެ. އެގޮތުން ކޮންމެ ރަށަކަށް ފަޅުރަށެއް ލިބޭނެ އުސޫލެއް މިހާރު ހަމަޖައްސާފައިވާތީ ކައުންސިލްތަކުން އެ ފުރުސަތުގެ ބޭނުން ވަރަށް ބޮޑަށް ހިފަމުންދާ ކަމަށްވެސް ވިދާޅުވި އެވެ.
"މިއުސޫލުގެ ދަށުން ކައުންސިލްތަކުން ފަޅުރަށްތައް ހޯދުމަށްވެސް ކައުންސިލްތަކުން ހުށަހަޅަމުން އެބަދޭ،" އާދަމް ޝަރީފް ވިދާޅުވި އެވެ.
މިނިސްޓަރު އިތުރަށް ވިދާޅުވީ ކައުންސިލްތަކަށް ބޭނުންވަނީ ރަނގަޅު މާހައުލެއްގައި އަދި ގާނޫނީ ބާރުވެރިކަމުގެ ތެރެއިން ރައްޔިތުންނަށް ހިދުމަތް ކުރެވޭނެ ގޮތްތަކެއް ކަމަށެވެ. މިކަން ހާސިލްކުރުމަށްޓަކައި ލާމަރުކަޒީ ނިޒާމަކީ ރައްޔިތުން ބަލައިގެންފައިވާ ލާމަރުކަޒީ ނިޒާމަކަށް ހެދުމަށް މަސައްކަތް ކުރާނެ ކަމަށްވެސް ވިދާޅުވި އެވެ.