ޓޫރިޒަމް ދާއިރާގެ ޖީއެސްޓީ -- ޓީޖީއެސްޓީ 17 ޕަސެންޓަށް ބޮޑުކުރަން މުދަލާއި ހިދުމަތުގެ އަގުން ޓެކްސް ނެގުމުގެ ގާނޫނަށް ގެނައި އިސްލާހުގެ ބިލް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ތަސްދީގު ކުރައްވައިފި އެވެ.
ސަރުކާރުން ސްޕޮންސަކޮށްގެން ރައްޔިތުންގެ މަޖިލީހަށް މި އިސްލާހު ހުށަހެޅުއްވީ މާފަންނު ހުޅަނގު ދާއިރާގެ ޕީއެންސީގެ މެންބަރު މުހައްމަދު މުސްތަފާ އެވެ.
ރައްޔިތުންގެ މަޖިލީހުން މިދިޔަ އޮކްޓޫބަރު 31 ވަނަ ދުވަހު މި އިސްލާހު ފާސްކުރީ 70 މެންބަރުން ތާއީދު ވޯޓާ އެކު އެވެ. މިއިސްލާހު ފާސްކުރުމާ ދެކޮޅަށް އެ ދުވަހުގެ ޖަލްސާގައި އަށް މެންބަރުން ވޯޓު ދެއްވި އެވެ.
ޓީޖީއެސްޓީ މިހާރު ނަގަނީ 16 ޕަސެންޓްގަ އެވެ. މަޖިލީހުން ފާސްކުރީ އަންނަ އަހަރުގެ ޖުލައި މަހުން ފެށިގެން 17 ޕަސެންޓްގައި ޓީޖީއެސްޓީ ނެގުމަށެވެ.
މިހާރު ނަގަމުންދާ ރޭޓުގައި -- ޖީއެސްޓީ 8 ޕަސެންޓަށް އަދި ޓީޖީއެސްޓީ 16 ޕަސެންޓަށް ބޮޑުކުރީ ޖެނުއަރީ 1، 2023 އިން ފެށިގެންނެވެ.