ފަލަސްތީނުގެ ހައްގުގައި މާނަހުރި ބަދަލުތަކެއް ގެނެސް، އަޅަންޖެހޭ ފިޔަވަޅެއް އަޅައި މައްސަލަ ނިންމުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިލްތިމާސް ކުރައްވައިފި އެވެ.
ރައީސުލްޖުމްހޫރިއްޔާ މިކަމަށް ގޮވާލެއްވީ ސައުދީ އަރަބިއްޔާގައި ކުރިއަށްދިޔަ ޖޮއިންޓް އަރަބް-އިސްލާމިކް ސަމިޓްގައި މިއަދު ތަގުރީރުކުރައްވަމުންނެވެ.
ސައުދީގެ ވެރިރަށް ރިޔާޟުގައި ކުރިއަށްދިޔަ ސަމިޓުގައި ރައީސުލްޖުމްހޫރިއްޔާ ކުރެއްވި ތަގުރީރުގައި، މުސްލިމު އަދި އަރަބި ގައުމުތަކުން ފަލަސްތީނަށް ތާއީދުކުރަނިވި އުސޫލަކުން ފިޔަވަޅުތައް އެޅުމަށް އިލްތިމާސް ކުރެއްވި އެވެ.
"އަޅުގަނޑުމެން އުއްމަތެއްގެ ގޮތުގައި މިހާރުން މިހާރަށް ފިޔަވަޅެއް ނާޅައިފިނަމަ ތާރީހުން އަޅުގަނޑުމެންގެ މައްޗަށް ހަރުކަށި ހުކުމް ކުރާނެ،" އެއްބައިވަންތަކަމާއި މާނަހުރި ބަދަލަކަށް މި ސަމިޓް ބަދަލުކުރުމަށް ގޮވާލައްވަމުން ރައީސް ވިދާޅުވި އެވެ.
ދުނިޔޭގެ އެކި ކަންކޮޅުތަކުގައި މުސްލިމުންނަށް ކުރިމަތިވެފައިވާ ގޮންޖެހުންތަކަށް ހައްލެއް ހޯދައި، ވަކިވެފައި އޮތް މިނިވަން، ދެ ދައުލަތުގެ ހައްލަކަށް ގްލޯބަލް އެލަޔަންސެއް ނުވަތަ އާލަމީ އަހްދެއް ބިނާކުރުމަށް ސައުދީ އަރަބިއްޔާގެ ރަސްކަމުގެ ޚާންދާނުން ކުރައްވަމުން ގެންދަވާ މަސައްކަތްޕުޅުތައް ފާހަގަކުރައްވައި ރައީސް ވަނީ ސައުދީ ސަރުކާރަށް ތައުރީފް ކުރައްވާފަ އެވެ.
މިކަމުގައި ސައުދީ އަރަބިއްޔާއިން ސާބިތުވެ އޮތުމަކީ، ފަލަސްތީނުގެ ރައްޔިތުންނަށް އިންސާފާއި، އަމިއްލަ ނިންމުންތައް ނިންމުމުގެ ހައްގު ކަށަވަރުކޮށްދީ، އުއްމީދާއި ހިތްވަރު އާކޮށްދެނިވި އަލިކަމެއްގެ ގޮތުގައި ރައީސުލްޖުމްހޫރިއްޔާ ވަނީ ސިފަކުރައްވާފަ އެވެ.
ރައީސް ވިދާޅުވީ ފަލަސްތީނުގެ ރައްޔިތުންނާ ދެކޮޅަށް އެތައް ޒަމާންތަކެއް ވަންދެން ދިގުލައި ގޮސްފައިވާ އަނިޔާވެރިކަން ނިމުމަކަށް އަންނަންޖެހޭ ކަމަށެވެ. އަދި އެނިޔާވެރިކަން "ފުދިއްޖެ" ކަމަށާއި "ދެން އިތުރަށް އެކަން ބަރުދާސްތުކުރުމެއް ނެތް" ކަމަށްވެސް ވިދާޅުވި އެވެ. ރައީސްގެ ވާހަކަފުޅުގައި ވަނީ އިޒްރޭލުގެ އުދުވާނީ އަމަލުތައް ކުށްވެރި ކުރަމުން ދިޔަ ކަމުގައިވީ ނަމަވެސް، އާރާއި ބާރު ލިބިފައިވާ ވެރިންގެ ކިބައިން، އެކަށީގެންވާ ފިޔަވަޅުތަކެއް އަޅުއްވާ މަންޒަރު ފެނިގެން ނުދާ ކަމަށް ވިދާޅުވެފަ އެވެ.
ފަލަސްތީނުގެ ރައްޔިތުންނާ ދެކޮޅަށް އިޒްރޭލުން ހިންގަމުން ގެންދާ އަނިޔާވެރި އިސްތިއުމާރީ އަޅުވެތިކަމާއި ނަސްލު ނައްތާލުމުގެ ގަތުލުއާންމު ރައީސް ވަނީ ވަރަށް ބޮޑަށް ކުށްވެރިކުރައްވާފަ އެވެ.
ރައީސް މުއިއްޒު ވަނީ މިދިޔަ 75 އަހަރު، ފަލަސްތީނުގެ ރެފިއުޖީންނަށް އެހީތެރިކަން ފޯރުކޮށްދެމުންދިޔަ އދގެ ޖަމިއްޔާ -- ޔޫއެންއާރްޑަބްލިއުއޭ، އިޒްރޭލުން ރޫޅާލި ރޫޅާލުން ކުށްވެރިވެސް ކުރައްވާފަ އެވެ.
"އެއީ އިންތިހާއަށް މުހިއްމު ޖަމިއްޔާއެއް. އެ ޖަމިއްޔާއަށް ބޭނުންވާ އެހީ ދިނުމުގައި ދެމިތިބުމަށް ބައިނަލްއަގްވާމީ މުޖުތަމައަށް ގޮވާލަން،" އެމަނިކުފާނު ވިދާޅުވި އެވެ.
ރައީސް ވިދާޅުވީ މިމައްސަލައިގައި ބައިނަލްއަގްވާމީ މުޖުތަމައުގެ ހަރަކާތްތެރިކަމާއި އަޅާލުންކުޑަކަމާއި، ވަކިން ހާއްސަކޮށް އދގެ ސަލާމަތީ މަޖިލީހުގެ އަމަލުތައް ފާހަގަކުރައްވައި، ވީޓޯގެ ބާރު ބޭނުންކުރުމުގެ ސަބަބުން މާނަހުރި ފިޔަވަޅުތަކަށް ހުރަސްއެޅި، ހަނގުރާމައިގެ ޖަރީމާތަކާއި ހަތިޔާރު ފޯރުކޮށްދިނުމުގެ މަގު ފަހިވެގެން ގޮސްފައިވާ ކަމަށެވެ.
ރައީސްގެ ވާހަކަފުޅު ނިންމަވާލައްވަމުން ސައޫދީ އަރަބިއްޔާގެ ލީޑަޝިޕާއި އެއްބައިވަންތަކަން މި ސަމިޓުން ދައްކުވައިދީފައިވާކަން ފާހަގަކުރައްވައި، މާނަހުރި ބަދަލުތަކެއް ގެނައުމަށްޓަކައި މުސްލިމު އަދި އަރަބި ގައުމުތައް ގުޅިގެން މަސައްކަތްކުރުމަށް ގޮވާލެއްވި އެވެ.
ޖޮއިންޓް އަރަބް-އިސްލާމިކް ސަމިޓުގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާ ސައޫދީ އަރަބިއްޔާގެ ރިޔާޟަށް ވަޑައިގަތީ، މާތްވެގެންވާ ދެ ހަރަމްފުޅުގެ ހާދިމް އަދި ސައޫދީ އަރަބިއްޔާގެ ރަސްގެފާނު ސަލްމާން ބިން އަބްދުލްއަޒީޒްގެ ދައުވަތަކަށެވެ.
މަތީ ފަންތީގެ ވަފުދަކާއެކު ކުރައްވާ މި ދަތުރުފުޅުގައި، އިޒްރޭލުގެ އިސްތިއުމާރީ ބާރުތަކުން ފަލަސްތީނާއި ލުބްނާނަށް ދެމުންދާ ހަމަލާތަކާއި، ސަރަހައްދީ ހުތޫރަތްތެރި މައްސަލަތަކާމެދު، ސަރަހައްދީ އިސްވާރުން ކުރެއްވި މަޝްވަރާގައި ރައީސުލްޖުމްހޫރިއްޔާ ވަނީ ބައިވެރިވެވަޑައިގެންފަ އެވެ.