އިޒުރޭލުން ފަލަސްތީނަށް ދިން ހަމަލާތަކުގައި ފަލަސްތީންގެ ރައްޔިތުންނަށް ލިބުނު ގެއްލުމުގެ ބަދަލު އިޒުރޭލުން ދޭން ޖެހޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މުއިއްޒު މިހެން ވިދާޅުވީ ފަލަސްތީނުގެ ޣައްޒާގައި އިޒުރޭލުން ދެމުން ގެންދާ ހަމަލާތައް ހުއްޓާލުމަށާއި ހަމާސް އިން ރަހީނުކޮށްފައިވާ އިޒްރޭލު މީހުން މިނިވަންކުރުމަށް ދެ ފަރާތުން އެއްބަސްވުމާ ގުޅިގެން ސޯޝަލްމީޑިއާގައި ކުރެއްވި ޕޯސްޓެއްގައެވެ.
ރައީސްގެ ޕޯސްޓްގައި ވަނީ ޣައްޒާއަށް ދޭ ހަމަލާތައް މެދުކަނޑާލަން ނިންމަން މެދުވެރި ވެދިން ފަރާތްތަކުން ކުރި މަސައްކަތް ފާހަގަ ކުރައްވައި، އެ ފަރާތްތަކުގެ އަގު ވަޒަންކުރައްވާފަ އެވެ. އަދި ހަމަލާތައް ހުއްޓާލުމަކީ ހިތްޕުޅަށް ލިބިވަޑައިގަތް ހަމަޖެހުމެއްގެ ގޮތުގައި ސިފަކުރައްވާފައިވެ އެވެ.
ހަމަލާތައް ހުއްޓާލުމަށް ނިންމި ނިންމުން ދެމެހެއްޓުމަށާއި، ގެދޮރު ގެއްލިފައިވާ މީހުންނަށް އެމީހުންގެ ވަޒަނަށް އަނބުރާ ދެވޭނެ ފުރުސަތު ފަހިކޮށްދިނުމަށާއި، އިންސާނީ އެހީއަށް ފުރުސަތު ދިނުމަށް، ބައިނަލްއަގްވާމީ މުޖުތަމައުގެ ކިބައިން ރައީސް ވަނީ އެދިވަޑައިގެންފަ އެވެ.
ރައީސްގެ ޕޯސްޓްގައި ވިދާޅުވީ އިޒުރޭލުން ފަލަސްތީނަށް ދިން ހަމަލާތަކުގައި ފަލަސްތީންގެ ރައްޔިތުންނަށް ލިބުނު ގެއްލުމުގެ ބަދަލު އިޒުރޭލުން ދޭން ޖެހޭނެ ކަމަށެވެ. އަދި އިޒުރޭލުން ދިން ހަމަލާތަކުގައި ސުންނާފަތިވެފައިވާ އިމާރާތްތަކާއި ބިނާރު، އަލުން އާރާސްތުކުރުމަށް ބޭނުންވާ އަވަސް އެހީ ފަލަސްޠީނަށް ފޯރުކޮށްދިނުމަށްވެސް ގޮވާލެއްވި އެވެ.
ފާއިތުވެ ދިޔަ 15 މަސް ދުވަހުގެ ތެރޭގައި ރާއްޖެ އިން ވަނީ، ބައިނަލްއަގްވާމީ އެކި މަންސަތަކުގައި ފަލަސްތީނުގެ ރައްޔިތުންގެ ހައްގުގައި ގިނަ މަސައްކަތްތަކެއް ކޮށްފަ އެވެ. އެގޮތުން އދގެ ސަލާމަތީ މަޖިލީހުގެ 79 ވަނަ ސެޝަންގައި ތަގުރީރު ކުރައްވަމުން ރައީސުލްޖުމްހޫރިއްޔާ ވަނީ ގައުމަކުން އިންސާނީ ހައްގުތަކަށް އަރައިގަންނަ ހިނދު، އެކަން ތަހައްމަލުކޮށްގެން ތިބެގެން ނުވާނެ ކަމަށް ވިދާޅުވެފަ އެވެ. އަދި އެފަދަ ހާލަތެއްގައި އެ ގައުމެއްގެ ކުޑަބޮޑު މިނަކީ ނުވަތަ އެ ގައުމެއްގެ މުއްސަނދިކަމަކީ ބަހަނާއަކަށް ވެގެން ނުވާނޭ ކަމަށްވެސް ވިދާޅުވި އެވެ.
ގާނޫނުގެ ވެރިކަން ނެގެހެއްޓުމުގެ މުހިއްމުކަން ފާހަގަކުރައްވައި، ރައީސުލްޖުމްހޫރިއްޔާ ވަނީ އދގެ ފުރިހަމަ މެންބަރުކަން ފަލަސްތީނަށް ދިނުމަށްވެސް ގޮވާލައްވާފަ އެވެ. މީގެ އިތުރުން ފަލަސްތީނުގައި ހިންގަމުން ގެންދިޔަ ގަތުލުއާންމުއާ ދެކޮޅަށް ބައިނަލްއަގްވާމީ ކޯޓުތަކަށް ހުށަހެޅި ބޮޑެތި މައްސަލަތަކުގައި ފަލަސްޠީނުގެ ރައްޔިތުންގެ ހައްގުގައި ވަކާލާތު ކޮށްދިނުމަށް ރާއްޖެއިން ވަނީ ތަދައްހުލުވެފަ އެވެ.