ސިވިލް އޭވިއޭޝަން އޮތޯރިޓީ (ސީއޭއޭ)ގެ މުވައްޒަފުންގެ ފަރާތުން ރައީސް ޑރ. މުހައްމަދު މުއިއްޒަށް ޕެޓިޝަނެއް ހުށަހަޅައިފި އެވެ.
މިއީ ސީއޭއޭގެ އާ އޮނިގަނޑާ އެއްގޮތަށް ޖެނުއަރީ މަހުގެ މުސާރަ ލިބިފައި ނުވާތީ ކަންބޮޑުވުން ފާޅުކޮށް ހުށަހެޅި ޕެޓިޝަނެކެވެ.
ސީއޭއޭގެ ބައެއް މުވައްޒަފުން މިއަދު ބުނި ގޮތުގައި އާ އޮނިގަނޑާ އެއްގޮތަށް މުސާރަ ދިނުމަށްޓަކައި މުވައްޒަފުންނާ އެކު އެއްބަސްވުމެއްވެސް ވަނީ ހަދާފަ އެވެ. އެކަމަކު ޖެނުއަރީގެ މުސާރަ ލިބުނުއިރު އާ އޮނިގަނޑާ އެއްގޮތަށް މުސާރަ ލިބިފައި ނުވާ ކަމަށް މުވައްޒަފުން ބުންޏެވެ.
ރައީސްއަށް ހުށަހެޅި ޕެޓިޝަންގައިވާ ގޮތުން އާ އޮނިގަނޑާ އެއްގޮތަށް ސީއޭއޭގެ މުވައްޒަފުންނަށް ޖެނުއަރީ މަހުގެ ތެރޭގައި މުސާރަ ލިބިފައި ނުވަނީ ކަމާގުޅޭ އިދާރާތަކުގެ ހުއްދަ ލިބިފައި ނުވާތީ އެވެ.
މުވައްޒަފުންގެ ޕެޓިޝަންގައި ވަނީ ރައީސް މުއިއްޒުއާ ވީހާވެސް އަވަހަށް ބައްދަލުކުރުމަށްވެސް އެދިފަ އެވެ.
