ހުއްޓުމަކަށް ގެނެސްފައި އޮތް، ރާއްޖޭގެ އެންމެ ދުވަސްވީ ނޫސް، "ހަވީރު" ގެ އޮފީސް އިމާރާތުގެ ބައެއްގައި ރޯކޮށްލައިފި އެވެ. އެހެން ނަމަވެސް އިރުކޮޅެއްގެ ތެރޭގައި އަލިފާންގަނޑު ވަނީ ނިއްވާލައިފަ އެވެ.
ރޭ ދަންވަރު ގާތްގަނޑަކަށް، 2:30 ގައި ދިން މި ހަމަލާގައި ރޯކޮށްލާފައި ވަނީ އަމީނީ މަގުގައި ހުންނަ ހަވީރުގެ މައި އިދާރާގެ ރިސެޕްޝަންގަ އެވެ. ރިސެޕްޝަން އޭރިއާ އެއްކޮށް އަނދައި ބޮޑެތި ގެއްލުންތަކެއް ލިބިފައިވާއިރު އެތަނުގައި ރޯކޮށްލި މީހާ ފިލާފައިވާ ކަމަށްވެ އެވެ. އެހެން ނަމަވެސް މި ހަމަލާއެއް ދިނުމުގައި ބައިވެރިވި ކަމަށް ތުހުމަތުކުރެވޭ މީހާ ގެންގުޅުނު ދަބަހެއް އެ ސަރަހައްދުން ސަލާމަތީ ބާރުތަކުގެ ބެލުމުގެ ދަށަށް ގެންގޮސްފައިވެ އެވެ.
އަލިފާންގަނޑު އިތުރަށް ފެތުރިޔަ ނުދީ ނިއްވާލާފައި ވަނީ ސިފައިންނާއި ފުލުހުން ގުޅިގެން ކުރި މަސައްކަތުންނެވެ. އެތަނުގައި ރޯކޮށްލި އިރު ހިއްސާދާރުންގެ މެދުގައި އުފެދުނު މައްސަލައެއްގައި އެއްގަލަކަށް ނޭރި ހަވީރުގެ މަސައްކަތްތައް ހުއްޓާލާފައި އޮންނަތާ މިހާރު މި ވަނީ މަސްދުވަސް ފާއިތުވެފަ އެވެ. ހިއްސާދާރުންގެ މެދުގައި އުފެދިފައިވާ މައްސަލައިގެ އަޑުއެހުންތައް ސިވިލް ކޯޓްގައި ދަނީ ކުރިއަށެވެ.