ވައިގެމަގުން ރާއްޖެ އެތެރެކުރަން އުޅުނު 2.4 ކިލޯގެ މަސްތުވާތަކެތި ކަސްޓަމްސްވއިން އަތުލައިގަނެފި އެވެ.
މަސްތުވާތަކެތި އެތެރެކުރީ ތައިލޭންޑުން މިދިޔަ ބްރާސްފަތި ދުވަހު ރާއްޖެއައި އުމުރުން 41 އަހަރާއި 21 އަހަރުގެ ދިވެހި ދެ ފިރިހެނުންނެވެ.
ކަސްޓަމްސް އިން ބުނީ އެ ދެ ފަސިންޖަރުންގެ އަމަލުތައް ހުރިގޮތުން އެ މީހުންނާ މެދު ޝައްކު ކުރެވިގެން އިތުރަށް ބަލައި ފާސްކުރުމުގެ ތެރޭގައި ދެ މީހުންގެ ހަށިގަނޑުގައި މަސްތުވާތަކެތި ރައްކާކޮށްފައި ހުއްޓާ ފެނިފައިވާ ކަމަށެވެ.
އަތުލައިގަނެވުނު ތަކެތި ފުރަތަމަ މަރުހަލާގައި ތަހުލީލުކުރިއިރު މަސްތުވާތަކެތީގެ ދެ ބާވަތެއް ކަމަށްވާ ހެރޮއިން އަދި މެފެޑްރޯން ޕޮޒިޓިވް ވެފައިވެ އެވެ.
ކަސްޓަމްސް އިން ބުނާ ގޮތުގައި މި ދެ މީހުންގެ ހަށިގަނޑުގައި ފޮރުވާފައި ހުއްޓާ ފެނުނީ 0.32 ކިލޯގެ ހެރޮއިންނާއި، 2.1 ކިލޯގެ މެފެޑްރޯން އެވެ.
މިތަކެތީގެ ބަރުދަނުގައި ޕެކިންއާއި އެކު ޖުމްލަ 2.4 ކިލޯ ހުރިއިރު މިތަކެތީގެ މަގުމަތީ އަގަކީ ގާތްގަނޑަކަން 5.5 މިލިއަން ދިވެހި ރުފިޔާ ކަމަށް ކަސްޓަމްސް އިން ލަފާކުރެ އެވެ.
ކަސްޓަމްސް އިން ބުނީ މި މައްސަލަ އިތުރަށް ތަހުގީުކުރުމަށްޓަކައި، އަތުލައިގަނެވުނު މަސްތުވާތަކެއްޗާއި މައްސަލައިގައި ޝާމިލްވާ ދެ މީހުން ފުލުހުންނާ ހަވާލުކޮށްފައިވާ ކަމަށެވެ.