ހަޅުތާލުކުރަންވާނީ މަސްލަހަތު ނުގެއްލޭ ގޮތަށް: އެޗްއާރްސީއެމް

ހިޔާލުފާޅުކުރުމާއި، ހައްގުތަކަށް ވަކާލާތުކޮށް، މައްސަލަތަކާ ދެކޮޅަށް ހަޅުތާލުކުރުމުގެ ހައްގުގެ ބޭނުން ހިފަން ވާނެ ކަމަށާއި އެކަމަކު އެ ހައްގުތަކުގެ ބޭނުން ކުރަންވާނީ ގައުމާއި ރައްޔިތުންގެ މަސްލަހަތު ނުގެއްލޭ ގޮތަށް ކަމަށް އެޗްއާރްސީއެމުން ބުނެފި އެވެ.

މިއަދު ފާހަގަކުރާ މަސައްކަތްތެރިންގެ ދުވަހާއި ގުޅިގެން އެޗްއާރްސީއެމުން ނެރުނު ބަޔާނެއްގައި ބުނީ، މަސައްކަތުގެ ދާއިރާގައި ދިމާވާ ގޮންޖެހުންތަކާއި މައްސަލަތައް ހައްލުކޮށް، އުނިވާ ހައްގު ހޯދުމަށް ހިޔާލު ފާޅުކުރުމާއި ހަޅުތާލުކުރުމުގެ މިނިވަންކަން މަސައްކަތްތެރިންނަށް ދޭންޖެހޭ ކަމަށެވެ. އަދި އެހައްގުތައް މަސައްކަތްތެރިންނަށް ދިނުމަށް ގޮވާލާ ކަމަށް އެޗްއާރުސީއެމްގެ ބަޔާނުގައިވެ އެވެ.

ހިޔާލު ފާޅުކުރުމުގެ މިނިވަންކަމާއި ހައްގަށް ވަކާލާތުކޮށް މައްސަލަތަކާއި ދެކޮޅަށް ހަޅުތާލުކުރުމުގެ މިނިވަންކަން ގާނޫނުން ލިބިފައި އޮތަސް، ހަޅުތާލުކުރާ އިރު ހުދޫދުތަކުގެ ތެރޭގައި އެކަން ކުރުމަށް ވެސް އެ ކޮމިޝަންގެ ބަޔާނުގައި ވަނީ ގޮވާލައިފަ އެވެ. ހިޔާލު ފާޅުކޮށް ހަޅުތާލުކުރާއިރު ހުތުރުބަހުން މުއާމާލާތު ނުކުރުމާއި ކުޑަކުދިން އެ ފަދަ ކަންކަމުގެ ތެރެއަށް ނުވެއްދުމާއި ލާއިންސާނީ އަމަލުތައް ނުހިންގުމާއި ގައުމީ މަސްލަހަތައް ފުށޫ ނާރާ ގޮތަށް އެފަދަ ހަރަކާތްތައް ކުރިއަށް ގެންދިއުމަށް ވެސް އެ ކޮމިޝަނުން ވަނީ ގޮވާލައިފަ އެވެ.

"ހިޔާލުފާޅުކުރުމުގެ ހައްގުގެ ބޭނުން ހިފާއިރު، މީހުންގެ އަބުރާއި އިއްޒަތް ނުގެއްލޭ ގޮތަށް އަމަލުތައް ބެހެއްޓުމަށް މިކޮމިޝަނުން ގޮވާލަން،" އެޗްއާރްސީއެމުން ބުންޏެވެ.

އެ ކޮމިޝަނުން ބުނީ، ހިޔާލު ފާޅުކުރުމުގެ މިނިވަންކަމާއި ސުލްހަވެރިކަމާއެކު ހައްގުތައް ހޯދަން މަސައްކަތްކުރުމުގެ ހައްގު ރައްޔިތުންނަށް ހޯދައިދިނުމަކީ ދައުލަތުގެ މައްޗަށް ލާޒިމްވާ ގާނޫނީ ޒިންމާއެއް ކަމަށެވެ. އެހެންކަމުން މަސައްކަތްތެރިންނަށް އެމީހުންނަށް ލިބިފައިވާ ހައްގުތައް އެ އޮންނަ އުސޫލުގެ ތެރޭގައި ބޭނުންކުރުމަށް އެ ކޮމިޝަނުން ވަނީ ގޮވާލައިފަ ކަމަށެވެ.

"ގާނޫނުއަސާސީގެ 37 ވަނަ މާއްދާގައި މަސައްކަތްތެރިންގެ ހައްގުތައް ކަށަވަރުކޮށްދީ، އަދި މަސައްކަތްކުރުމުގައި ދިމާވާ ހިތްހަމަނުޖެހުންތައް ފާޅުކުރުމަށް ގާނޫނުއަސާސީގެ 31 ވަނަ މާއްދާއިން ހަޅުތާލުކުރުމުގެ މިނިވަންކަން ވަނީ ކަށަވަރުކޮށްދީފަ އެވެ،" ބަޔާނުގައި ބުންޏެވެ.