- ނާޝިދުގެ އެތެރެ ހަށިވަނީ އެކީ ހަލާކުވެފައި
- ނާޝިދަށް ހަމަލާދޭންވީ ސަބަބެއް ނޭނގެ
- އާއިލާއަށް ވަނީ ޝޮކެއް ލިބިފައި
ޒަހަމްތަކަކާ އެކު އައިޖީއެމްއެޗް ކައިރިއަށް ވެއްޓިފައި އޮއްވާ މިއަދު ހެނދުނު ފެނުނު ފުވައްމުލަކު ދޫޑިގަމު ނާޝިދް މޫސާ 30 އަށް ބަޔަކު ހަމަލާ ދީފައިވާ ކަމަށާއި އެކަން ކުރި ބަޔަކު އެކަން ކޮށްފައި ވަނީ ގަސްދުގައި އޭނާ މަރާލުމުގެ ބޭނުމުގައި ކަމަށް ނާޝިދުގެ އާއިލާއިން މިރޭ ބުނެފި އެވެ.
ޒަހަމްތަކާއެކު މަގުމަތިން ފެނުނު އެ ޒުވާނާ އައިޖީއެމްއެޗް އައިސީޔޫގައި މިހާރުވެސް އޮތީ ވެންޓިލޭޓަރުގެ އެހީގައެވެ. އޭނާގެ ހިތުގެ ވިންދު ކުޑަކޮށް ހުރި ނަމަވެސް ސިކުނޑި ވަނީ އެއްކޮށް މަރުވެފައި ކަމަށް ހޮސްޕިޓަލުން ވެސް އަދި އާއިލާއިން ވެސް ބުނެ އެވެ.
އާއިލާގެ ފަރާތުން "އަވަސް" އާ ވާހަކަދައްކަމުން ނާޝިދުގެ ދައްތަ މިރޭ ބުނެފައިވަނީ ނާޝިދުގެ ބޭރުފުށުން ގިނަ ޒަހަމްތަކެއް ފެންނަން ނެތްނަމަވެސް އޭނާގެ އެތެރަހަށްޓަށް ގިނަ އަނިޔާތަކެއް ވެފައިވާކަމަށް ނާޝިދު ބެލި ޑޮކްޓަރުން ބުނެފައިވާ ކަމަށެވެ. އެހެންކަމުން ނާޝިދަށް އަނިޔާކުރި ބަޔަކު އެ އަނިޔާތަކެއް ދިނީ އޭނާ މަރާލުމުގެ ނިޔަތުގައި ކަމަށް އާއިލާއިން ގަބޫލުކުރާ ކަމަށާއި އެކަމަކު އެފަދަ އަނިޔާއެއް ނާޝިދަށް ދޭންޖެހޭ ސަބަބެއް އެއްގޮތަކަށް ވެސް ނުވިސްނޭ ކަމަށެވެ.
"ނާޝިދަށް ބޭރުފުށަށް އެނގޭވަރުގެ އަނިޔާއަކަށް ލިބިފައި ހުރީ މަދު އަނިޔާތަކެއް. އެކަމަކު އޭނާގެ އެތެރަހައްޓަކު ނެތް އިންދިރާސް (ނެތިގެން ގޮސްފައި ވަނީ) ވެސް. ޑޮކްޓަރުން ބުނީ އޭނާގެ އެތެރަހައްޓަށާއި ސިކުނޑިއަށް އެއްކޮށް ލޭ އަރާފައިވާ ކަމަށް. އެހެންވީމަ އެވަރުގެ ސީރިއަސް ހާލަތަކަށް މީހާ ދާނީ ބަޔަކު އޭނާ މަރާލަން ބޭނުންވެގެން އަނިޔާ ދިނުމުން ކަމަށް ގަބޫލުކުރަން،" ނާޝިދުގެ ދައްތަ ބުންޏެވެ.
މިއަދު ހެނދުނު 9:20 ހާއިރު ނާޝިދު ފެނިފައިވަނީ އައިޖީއެމްއެޗްގެ އެމަޖެންސީފަޅިއާވީ ސަރަހައްދުގައި ހޭނެތިފައި އޮއްވަ އެވެ. އެއާއެކު އޭނާ އައިޖީއެމްއެޗަށް ގެންގޮސް ވަނީ ފަރުވާ ދޭން ފަށާފަ އެވެ. ބޮލުން ތަންކޮޅެއް ފަޅައިގެން ގޮސްފައިވުމުގެ އިތުރަށް ނާޝިދުގެ ބުރަކަށީގެ ބައެއް އޮތީ "ޗަސް" ވެފައި ކަމަށް ޑޮކްޓަރުން ބުނެފައިވާ ކަމަށް އާއިލާއިން ބުންޏެވެ. އޭގެ އިތުރަށް އަތުގެ ތަންކޮޅެއް ވަރަށް ބޮޑަށް ނޫފައިގެންފައިވާ ކަމަށް ވެސް ޑޮކްޓަރުން ބުނެފައިވާ ކަމަށް އާއިލާއިން ވަނީ ބުނެފަ އެވެ.
އާއިލާއިން ބުނީ ނާޝިދަކީ ގޭންގް މާރާމާރީ ތަކާއި އެއްވުންތަކުގައި ބައިވެރިވެ އުޅޭ މީހެއް ނޫން ކަމަށެވެ. އެހެންކަމުން ވަކި ބަޔަކަށް އިނގިލި ދިއްކުރަން ނޭނގޭ ކަމަށް ވެސް ބުންޏެވެ. އެމައްސަލަ ފުލުހުންވެސް ބަލަމުންދާތީ އާއިލާ ވެސް އޮތީ ފުލުހުންގެ ޖަވާބެއްގެ އިންތިޒާރުގަ އެވެ. ފުލުހުން ބުނީ ނާޝިދާ ގުޅޭ ގޮތުން މައުލޫމާތެއް އަދި ހިއްސާ ކުރެވެން ނެތް ކަމަށެވެ.