ލޯބި ބޭނުންވަނީ ކިހާ ވަރަކަށް ހެއްޔެވެ. ލޯބި ދޭން ބޭނުންވަނީ ކިހާ ވަރަކަށް ހެއްޔެވެ؟ ޔަގީނުންވެސް ލޯތްބާއި ނުލައި އުފާވެރި ދިރިއުޅުމެއްގެ ކޮޅުމަތި ވެސް ނުފެންނާނެއެވެ. ލޯތްބަކީ އާސޯހުވެ ދެލޯ ބޮޑުވެފައިވާ ލޯބިވެރިޔާއިން ފެށިގެން ގައިގެ ވަރުދޫވެ އެނދުމަތިވެފައި އޮންނަ މުސްކުޅި ބޭބެ ވެސް އެންމެ ލިބުމަށް އެދޭނެ ވަސީލަތެވެ. ގުދުތަރީ ގުޅުންތައް ގުޅުވާލަދޭ "ބްރިޖެ"ވެ. ދެ ލޯބިވެރިއެއްގެ ދެމެދު ފުރިގެން ބަންޑުންވާ ވަރަށް ލޯބި ނެތިއްޖެނަމަ ލޯބީގެ ވާފަށް ކިތަންމެ ދިގަސް، އެ ފަށް ކުރުވެ ވަކި ހިސާބަކުން ކެނޑިގެންދެއެވެ. މަންމައާއި ދަރިފުޅާ ދެމެދު އޮންނަންވާ ސާފު ލޯބި ނެތިއްޖެނަމަ ދިރިއުޅުން އެ ވެޓުނީ ދުވަހަކުވެސް އަރައިގަންނަން ނޭނގޭފަދަ އަޑިނޭނގޭ އަނދަވަޅަކަށެވެ.
މިފަދަ މުހިއްމު އެއްޗެއް ދިރިއުޅުމުން މަދުވާން ފަށައިފިނަމަ ދެން ވާނެ ގޮތެއްވެސް ނޭނގެއެވެ. މިވަރަށް ވިސްނާލީމާ ނިކަން ފާޑެއްގެ އެއްޗެއް ހިތަށް އެރުމަކީ ވެސް އެކަށީގެންވާ ކަމެކެވެ. ކާޓޫން ތަކުން އެއޮއް ފެންނަ ޖާދޫގެ "ލަވް ޕޯޝަން" ހޯދަން ނިކުންނަން ވެސް ބޭނުން ވެދާނެ އެވެ. ދެރަވާނެ ކަމެއް ނެތެވެ. ތިޔަ ބޭނުންވާ ލަވް ޕޯޝަން ކުޑަ ގުޅިއެއްގައި މިންކޮށްގެން ހޯދަން ނުލިބުނަސް ހޯދިދާނެ ގޮތެއް އެބަ އޮތެވެ. އެގޮތަކީ ލޯބީގެ ހޯމޯން އިތުރުކުރުމެވެ. ހަށިގަނޑުގައި "އޮކްސިޓޮސިން" އުފައްދާ މިންވަރު އިތުރުކުރުމެވެ.
އޮކްސިޓޮސިން އަކީ ސިކުނޑީގެ ހައިޕޯތަލަމަސް އިން އުފައްދާ، ޕިޓިއުޓަރީ ގްލޭންޑުން ބޭރުކުރާ ހޯމޯން އެކެވެ. މި މުހިއްމު ހޯމޯނަކީ ދެ މީހަކު ލޯބިން ގުޅޭ ވަގުތުތަކުގަޔާއި، މައިމީހާ ދަރިއަށް ބަލިވެއިންނަ ދުވަސްވަރާއި، ދަރިއަކު އުފަންކުރާ ވަގުތުގެ އިތުރަށް، ކުޑަ ދަރިފުޅަށް ގާތުން ދިނުން ފަދަ ނާޒުކު ވަގުތުތަކުގައި އުފެދޭ ހޯމޯނެކެވެ. ހާއްސަކޮށް މައިންގެ ހަށިގަނޑުގައި މި ހޯމޯން ގެ ދައުރު ވަރަށް ބޮޑެވެ. މައިމީހާއާއި ގާތުން ކިރުދޭ ދަރިފުޅާ ދެމެދު އުފެދޭ ނާޒުކު ލޯބި އެންމެ ބޮޑަށް ދިރުވާ ހޯމޯނަކީ އޮކްސިޓޮސިން އެވެ. ލޯބިކުރާ ނުވަތަ "ކަޑްލް ހޯމޯން" އަކަށް އޮކްސިޓޮސިން ވެފައިވަނީ މި ސަބަބުތަކާ ހެދިއެވެ.
ވީމާ މި ހޯމޯން ރަނގަޅަށް އުފައްދާ ދެ ބައިވެރިޔަކަށް ފުރިހަމަ ޕޭރެންޓުންނަށް ވެސް ވެވިދާނެއެވެ. އަދި ހަޔާތުގައިވެސް ފުރިހަމަ ބައިވެރިންނަށް ވެވިދާނެ އެވެ.
އިންސާނުންނެކޭ އެއްގޮތަށް ޖަނަވާރުންގެ ހަށިގަނޑުގައި އޮކްސިޓޮސިން ހުންނަ ވަރު ބެލުމަށް ވަރަށް ކުރިންފެށިގެންވެސް ދިރާސާތަކެއް ވަނީ ކޮށްފައެވެ. އެގޮތުން މަދުން އޮކްސިޓޮސިން އުފައްދާ ޖަނަވާރުންގެ ކިބައިން އެތަކެތީގެ ދަރިން ސާފުކުރުމާއި ލޯބިކޮށްލަން ދޫލުމާއި އެފަދަ އެހެނިހެންވެސް ހަރަކާތްތައް އެ ނޫން ޖަނަވާރުންނާ އަޅާ ބާލާއިރު މަދުކަން ވަނީ ފާހަގަކުރެވިފަ އެވެ.
އޮކްސިޓޮސިން ހޯމޯން ލެވެލް އިތުރުކުރެވިދާނެ!
އޮކްސިޓޮސިން އިތުރުކުރުމަށް ބޭހާއި އިންޖެކްޝަން ވެސް މިހާރު ވަނީ ތައާރަފްކޮށްފަ އެވެ. ނަމަވެސް އޮކްސިޓޮކްސިން އަކީ ހޯމޯނަކަށް ވާއިރު ބޭހުން ހޯމޯން ލެވެލް އިތުރުކުރަން މަސައްކަތް ކުރުމަކީ ކުރުމަށްވުރެ ނުކުރުން ބުއްދިވެރި ކަމެކެވެ. އޮކްސިޓޮސިން ނޭސަލް ސްޕްރޭ ވެސް ހުރެއެވެ. ނަމަވެސް އެފަދަ ސްޕްރޭ މާ ގިނަ މުއްދަތަކަށް ބޭނުންކުރުމަކީ ސިކުނޑިއަށް ވެސް ގެއްލުންވެދާނެ ކަމެކެވެ.
ބޭސް ބޭނުންކޮށްގެން ނޫނަސް އޮކްސިޓޮސިން ލެވެލް މަތި ކުރެވިދާނެއެވެ. ގުދުރަތީ ފަރުވާތަކަކީ އެންމެ ކޮލިޓީ ފަރުވާއެވެ. އޮކްސިޓޮސިން ހަށިގަނޑުގައި އުފައްދާ މިންވަރު އިތުރުކުރުމަށް ކޮންމެ ދުވަހަކުވެސް މަސައްކަތް ކުރެވިދާނެ އެވެ. ސިކުނޑި އުފާވާ ފަދަ ބައެއް ކަސްރަތު ކުރުން މިކަމުގައި މުހިއްމެވެ. ޔޯގާ އަކީ ހައްލެކެވެ. މީގެ އިތުރުންވެސް ލޯބިވާ މީހުންގެ ކައިރީގައި ގިނަ އުފާވެރި ވަގުތު ހޭދަކުރުމާއި، ކުޑަ ދަރިފުޅާއި ގިނައިން ވާހަކަ ދެއްކުމާއި، އަޅުކަން ކުރުމާއި، ހިތް އުފާވާ ކަންކަން ކުރުމާއި ބައިވެރިއާ އާ އެކު އުފާވެރި ވަގުތުކޮޅެއް ކޮންމެ ދުވަހަކުވެސް ހުސްކޮށްލުމަކީ ކުރެވިދާނެ ކަމެކެވެ. މިފަދަ ކަންކަމުން މީހާގެ ހިތުގައި ގުދުރަތީގޮތުން ލޯބި އުފަންވާނެ އެވެ. ހުންނަ ހެޔޮ މިޒާޖުގެ ސަބަބުން ހިތުގައި ލޯބި އިތުރުވެއްޖެ ނަމަ ގަދަކަމުން ލޯބި ދައްކަން ޖެހޭ ހިސާބެއް ނޯންނާނެ އެވެ.
ވީމާ ތިމާއަށް އިމާ ލޯބި ދޭންޖެހޭ މީހުންނަށް ލޯބި ދޭންޖެހޭ އެންމެ ފުން މިންވަރަސް ލޯބި ނުދެވޭހެން ހީވާނަމަ "ލަވް ޕޯޝަން" ހޯދަން ހިތަށް އެރުވުމުގެ ބަދަލުގައި ކުރެވިދާނެ ކަންކަން ވެސް އެބަހުރިކަން ހަނދާންކުރާށެވެ. ރަނގަޅު ބައިވެރިއަކަށް، މަންމަޔަކަށް، ބައްޕަޔަކަށް ހިތުގައި ލޯބި މަދުވެގެން ނުވެވިދާނެތީ އެކަމާ ހާސް ނުވާށެވެ. ލޯތްބަކީ ހިތުގައި އަށަގަނުވަން ބޭނުން ވަރަކަށް އަށަގެނުވިދާނެ އެއްޗެކެވެ.