ރާއްޖޭގެ ޖަލުތަކުގައި މަސައްކަތްކުރާ އޮފިސަރުން ތައުލީމީ ގޮތުން ގާބިލު ބަޔަކަށް ހެދުމަށް އިންސްޓިޓިއުޓް ފޯ ކަރެކްޝަނަލް ސްޓަޑީޒް (އައިކޯސްޓް) އިން ހިންގާ ކޯސްތަކުގެ ތެރެއިން މިއަހަރު ކޯސް ނިންމި ސަތޭކަ އަށްވުރެ ގިނަ ބައިވެރިންނަށް ސެޓްފިކެޓް ދީފި އެވެ.
ތިން ކޯހަކުން 104 ޕްރިޒަން އޮފިސަރުން ވަނީ މިއަދު ކޯސް ނިންމާ ސަނަދު ހާސިލްކޮށްފަ އެވެ. މިއަދު ސެޓްފިކްޓް ދީފައިވަނީ އައިކޯސްޓް އިން ފަސް ހަފްތާގެ މުއްދަތަށް ހިންގި ކަސްޓޯޑިއަލް ސުޕަވިޝަން ކޯހުގައި ބައިވެރިވި 90 ބައިވެރިންގެ ތެރެއިން ކޯހުން ފާސްވި 78 ބައިވެރިންނަށާއި، ހަމަ އެ މުއްދަތަށް ހިންގި ސެޓްފިކްޓް ވަން އިން ކޮމްޕިއުޓާ ސްޓަޑީޒް ގައި ބައިވެރިވި 20 އޮފިސަރުންގެ ތެރެއިން ފާސްވި 15 ބައިވެރިންގެ އިތުރަށް ދިހަ ދުވަހުގެ މުއްދަތަށް ކުރިއަށްގެންދިޔަ ފެސިލިޓޭޓާ ޓްރެއިނިން ޕްރޮގްރާމް ފުރިހަމަކުރި 11 އޮފިސަރުންނަށެވެ.
އައިކޯސްޓްގެ އަހަރީ ދުވަހާއި ގުޅުޅުވައިގެން މިއަދު މާފުށީ ޖަލުގައި ބޭއްވި ރަސްމިއްޔާތެއްގައި ކޯސް ފުރިހަމަކުރި އޮފިސަރުންނަށް ސެޓްފިކްޓް ހަވާލުކޮށްދެއްވީ ޑެޕިއުޓީ ކޮމިޝަނަރު އޮފް ޕްރިޒަންސް ހަސަން ޒިލާލާ ކޮމިޝަނާ އޮފް ޕްރިޒަންސް އަހުމަދު ޝިހާން އެވެ. ރަސްމިއްޔާތު ޝަރަފުވެރިކޮށްދެއްވީ ފުވައްމުލަކު މެދު ދާއިރާގެ މެންބަރު އަލީ ފަޒާލެވެ.
ރަސްމިއްޔާތުގައި ފަޒާލް ވިދާޅުވީ ގައުމު ބިނާ ކުރުމުގައި ހަމައެކަނި ތަރައްގީ ކުރުމުގައި އުމްރާނީ ވަސީލަތްތަކާ އެއްވަރަށް އިންސާނީ ވަސީލަތް ތަރައްގީ ކުރަން ޖެހޭ ކަމަށެވެ. މި ސަރުކާރުން މަސައްކަތް ކުރަނީ އެ ދެކަންތަކަށްވެސް ވިސްނައިގެން އެ ފިކުރުގައި ކަމަށެވެ. އޭނާ ވަނީ މިއަދު ސެޓްފިކެޓް ހޯދި ފަރާތްތަކަށް މަރުހަބާ ވިދާޅުވެފަ އެވެ.
މިއަދުގެ ރަސްމިއްޔާތުގައި އައިކޯސްޓުން ވަނީ އެ ތަނުގެ ކޯސްތަކުގެ ފެންވަރު ރަނގަޅުކޮށް އިތުރަށް ފުޅާކުރުމުގެ މަގްސަދުގައި އެ ތަނުގެ ކޯސް މެނޭޖްމެންޓް ސިސްޓަމެއް ވެސް ލޯންޗްކޮށްފައެވެ.