ސާކްގެ އެޕެކްސް ބޮޑީއެއް ކަމަށްވާ ސައިވޯކްސް އާއި ޖެންޑަ މިނިސްޓްރީ ގުޅިގެން ކުޑަކުދިންނަށް ދިމާވާ މައްސަލަތަކަށް އާންމުން ހޭލުންތެރިކުރުމުގެ ގޮތުން ޕޯސްޓަރުތަކެއް މިއަދު ނެރެފި އެވެ.
ދުނިޔޭގެ ކުޑަކުދިންގެ ދުވަހުގެ މުނާސަބަތާއި ގުޅިގެން މިއަދު ގިޔާސުއްދީން ސްކޫލުގައި ބޭއްވި ހާއްސަ ޖަލްސާއެއްގައި ކުޑަކުދިންނަށް އަނިޔާ ލިބޭ ފަސް ގޮތަކަށް ބިނާކޮށް ތައްޔާރުކޮށްފައިވާ ފަސް ޕޯސްޓަރު ވަނީ ދައްކާލާފަ އެވެ. ޕޯސްޓަރުތައް އިފްތިތާހުކޮށްދެއްވީ ފޮރިން މިނިސްޓަރު ދުންޔާ މައުމޫން އެވެ.
ޅަ އުމުރުގައި ކައިވެނިކުރުމާއި، ކުޑަކުދިން ވަގަށް ނެގުމާއި، ކުޑަކުދިން އެބިއުސް ކުރުމާއި، ބޮޑެތި އަނިޔާ ދިނުން ފަދަ ކަންތައްތަކުގެ މައްޗަށް ބިނާކޮށް ހާއްސަ މެސެޖްތަކެއްވެސް ހިމަނާފައިވާ އެ ޕޯސްޓަރު ތައް ރާއްޖޭގެ އެކި ސަރަހައްދުތަކުގައި މީގެ ފަހުން އާންމުކޮށް ފެންނަން ބަހައްޓާނެ ކަމަށް ޖެންޑަ މިނިސްޓްރީން ބުންޏެވެ.
މިއަދުގެ ޖަލްސާގެ ހުށަހެޅުމުގެ ހުރިހާ ކަމެއް ކުޑަކުދިން ކޮށްފައިވާ އިރު، ޖަލްސާގައި ދުވަހާ ބެހޭގޮތުން ވާހަކަ ދައްކާފައި ވަނީވެސް ކުޑަކުދިންނެވެ. މިގޮތުން ދުވަހުގެ މުނާސަބަތުގައި ކުޑަކުދިންނަށް ކުރާ އިލްތިމާސެއްގެ ގޮތުގައި ޖަލްސާގައި ވާހަކަ ދެއްކީ ޖަމާލުއްދީން ސްކޫލުގެ ދަރިވަރެއް ކަމަށްވާ މުހައްމަދު ރިޔާޝް އަބްދުލް މަޖީދެވެ. ރިޔާޒް ވަނީ އެންމެހައި ނުރަނގަޅު އާދަތަކުން ސަލާމަތްވުމަށް ހުރިހާ ކުޑަކުދިންނަށް ގޮވާލާފަ އެވެ. ބުލީ ކުރުމާއި މީހުންނަށް ފުރައްސާރަކޮށް މަލާމާތްކުރުމުގެ އާދައިން ސަލާމަތްވެ، ރީތި ސިފަތަކެއްގެ ވެރި ބަޔަކަށް ވުމަށް ހުރިހާ ކުޑަކުދިންނަަށް އިލްތިމާސްކޮށްފަ އެވެ.
މިއަދުގެ ޖަލްސާގައި ވަނީ ކުޑަކުދިންގެ ހިޔާގައި ތިބޭ ކުދިންގެ އުންމީދުތަކުގެ މައްޗަށް ތައްޔާރުކޮށްފައިވާ ކުރު ވާހަކަ ސީރީސް އެއް ވެސް ލޯންޗުކޮށްފަ އެވެ.
ޖަލްސާގައި އެކި ސްކޫލްތަކުގެ ކުދިންވަނީ ރީތި ސްޓޭޖް އައިޓަމްތަކެއް ވެސް ހުށަހަޅާދީފަ އެވެ.