މިދިޔަ އަހަރު އޭލެވެލް އިމްތިހާނުގައި ބައިވެރިވެ އެންމެ ރަނގަޅު ނަތީޖާ ހޯދައިގެން ގަދަ 10 ގައި ހިމެނުނު 228 ކުދިންނަށް އިނާމާއި ސެޓްފިކެޓް ދީފި އެވެ.
އޭލެވެލް ނިންމާ އިމްތިހާނުތަކުން ރާއްޖޭގެ ވިހި ސްކޫލަކުން ޖުމްލަ 228 ދަރިވަރަކު އެންމެ މަތީ ދިހަ ވަނަ ރޭ ހާސިލްކޮށްފައިވާއިރު އޭގެ ތެރޭގައި އަންހެން 142 ދަރިވަރުންނާއި ފިރިހެން 86 ދަރިވަރުން ހިމެނެ އެވެ. އެކުދިންގެ ތެރެއިން ގަދަ އެކެއްގައި ހިމެނުނު ދަރިވަރުންނަށް އިނާމް ހަވާލުކޮށްދެއްވީ ރައީސް އަބްދުﷲ ޔާމީން އަބްދުލް ގައްޔޫމް އެވެ. އެކުދިންނަށް ވަނީ ރައީސްގެ ފަރާތުން ދެއްވާ ސްކޮލާޝިޕް ވެސް ހަވާލު ކޮށްދެއްވާފަ އެވެ.
ރޭގެ ރަސްމިއްޔާތުގައި ވަނީ ވަކި ވަކި މާއްދާތަކުން ދުނިޔޭގެ ގަދަ 10 ގައި ހިމެނުނު ރާއްޖޭގެ 16 ދަރިވަަރަކަށް ވެސް އިނާމު ދީފައެވެ. އެ ދަރިވަރުންގެ ތެރެއިން، 12 ދަރިވަރަކު ވަނީ އެކައުންޓިން މާއްދާއިން 100 ޕަސެންޓް ނަތީޖާ ހާސިލްކޮށްފަ އެވެ. މީގެ އިތުރުން އެޑްއެކްސްއެލް އޭލެވެލް އިމްތިހާނުތަކުން ތިން އޭ ސްޓާ އަށްވުރެ މަތިން ނަތީޖާ ހާސިލްކޮށްގެން އެޑްއެކްސްއެލް އިން ދޭ ހައި އެޗީވާ އެވޯޑް ހާސިލުކުރި ނުވަ ދަރިވަރުންނަށް ވެސް އެވޯޑު ދިނެވެ.
މިދިޔަ އަހަރު ރާއްޖޭގެ 53 ސްކޫލެއްގައި އޭލެވެލް އަށް ކިޔަވައިދީފައިވާ އިރު، ޖުމްލަ 48 ސެންޓަރަކުން 2120 ދަރިވަރުން މަތީ ސާނަވީ އިމްތިހާނު ފުރިހަމަކޮށްފައިވެއެވެ. އެއީ 1268 އަންހެން ދަރިވަރުންނާއި 852 ފިރިހެން ދަރިވަރުންނެވެ.