ޑިފެންސް މިނިސްޓްރީން ހުއްދަ ނުހޯދައި ނުރައްކާތެރި ކެމިކަލާއި އެސިޑާއި އެކި ބާވަތުގެ ވިހަ ރާއްޖެ ގެންނަކަން ފާހަގަވެފައިވާތީ ހުއްދަ ނުހޯދައި އެފަދަ ތަކެތި އެތެރެ ނުކުރަން އެ މިނިސްޓްރީން މިއަދު އަންގައިފި އެވެ.
ޑިފެންސް މިނިސްޓްރީން މިއަދު ކުރި އިއުލާނެއްގައި ބުނީ، ރާއްޖެއަށް ގެނައުން މަނާ ތަކެތީގެ ގާނޫނު ގެ ދަށުން އެ މިނިސްޓްރީގެ ހާއްސަ ހުއްދައެއް ލިޔުމަކުން ލިބިގެން ނޫނީ ރާއްޖެއަށް ގެނައުން މަނާކުރެވިފައިވާ ތަކެތީގެ ތެރޭގައި ހިމެނޭ ނުރައްކާތެރި ކެމިކަލާއި، އެފަދަ ކެމިކަލްތަކުން އުފައްދާ އެސިޑާއި، ބާވަތްބާވަތުގެ ވިހަ، މިނިސްޓްރީގެ ހުއްދަ ނުލިބެނީސް ބައެއް ފަރާތްތަކުން ރާއްޖެ ގެންނަކަން ފާހަގަވެފައިވާ ކަމަށެވެ.
ނުރައްކާތެރި ކެމިލަކާއި ވިހަ އާއި އެސިޑް ފަދަ ތަކެތި ރާއްޖެއަށް އެތެރެ ކުރުމުގެ ހުއްދަ ދޫކުރަނީ، އެ އެއްޗެއް ބޭނުންކޮށް ގެންގުޅެ އަދި ގުދަންކުރާ ފަރާތުން މި މިނިސްޓްރީން ކަނޑައަޅާފައިވާ މިންގަނޑަށް، އެ ގުދަން ހަދައި ރަޖިސްޓްރީ ކުރުމުން ކަމަށް ޑިފެންސް މިނިސްޓްރީން ބުންޏެވެ.
އެހެންކަމުން އެފަދަ އެއްޗެއް އެތެރެކުރަން ބޭނުންވާ ފަރާތްތަކުން އެތަކެތި ރާއްޖެއަށް ގެންނަން ވާނީ ހުއްދަ އާ އެކު އެ ގެންނަ ކެމިކަލެއް ރައްކާކުރާ ގުދަން ވެސް އެ މިނިސްޓްރީގައި ރަޖިސްޓާ ކޮށްގެން ކަމަށް އިއުލާނުގައި ބުންޏެވެ.
