އުރީދޫ ދިވެހި ޕްރިމިއާ ލީގްގައި މިރޭ، ނިއު ރޭޑިއަންޓާ ދެކޮޅަށް ކުޅުނު މެޗް 1-1 އެއްވަރުވެ ތާވަލުގެ ދެ ވަނަ އަށް އަރަން ލިބުނު ފުރުސަތު ޓީސީއަށް ގެއްލިއްޖެއެވެ.
މެޗް އެއްވަރުވެ ލިބުނު އެއް ޕޮއިންޓާއެކު ޓީސީ ހަތަރު ވަނައިގައި އޮތީ 11 ޕޮއިންޓް ލިބިގެންނެވެ.
މިރޭގެ މެޗުން މޮޅުވި ނަމަ ދެ ވަނައިގައި އޮތް އީގަލްސްއާ އެއް އަދަދަކަށް ޕޮއިންޓް ހޯދައި، ލަނޑުގެ ތަފާތުން އެޓީމަށް ދެ ވަނަ ލިބިގެން ދާނެއެވެ.
ލީގުގެ ތިން ވަނައިގައި އޮތީ ލީގްގައި މުޅިން އަލަށް ވާދަކުރާ ޔުނައިޓަޑް ވިކްޓްރީއެވެ.
މިރޭގެ މެޗްގައި ފުރަތަމަ ލީޑު ނެގީ ޓީސީއިންނެވެ. އެ ލަނޑު މެޗްގެ 17 ވަނަ މިނެޓްގައި އެ ޓީމަށް ކާމިޔާބު ކޮށްދިނީ އަލީ ނާފިއު (ކަޅޭ) އެވެ.
ފުރަތަމަ ހާފުގެ އެންމެ ފަހު މިނެޓްގައި ނިއު އަށް ނަތީޖާ ހަމަހަމަ ކޮށްދިނީ ބިދޭސީ ކުޅުންތެރިޔާ އޮއުނީ ޝެގޫން މިކޭލްއެވެ.
ދެ ވަނަ ހާފުގައި ދެ ޓީމުގެ ބެންޗުންވެސް ވަނީ ރެފްރީގެ ނިންމުމްތަކާ މެދު ހިތް ހަމަނުޖެހޭކަން ފާޅުކޮށްފައެވެ. މެޗަށް ފަހު ޓީސީގެ ކޯޗް މުހައްމަދު ނިޒާމް ވަނީ ރެފްރީއާ މެދު ހިތްހަމަނުޖެހޭކަން ފާޅުކޮށް، މެޗްގެ އިންތިޒާމްތައް ބަލަހައްޓަންތިބި އެފްއޭއެމްގެ އޮފިޝަލުންގެ ގާތު ޝަކުވާކޮށްފައެވެ. އަދި ފުރަތަމަ ހާފުގައި ނިއުގެ މެނޭޖަރު އަމީން ފައިސްލް ރެފްރީގެ ނިންމުންތަކާ މެދު ހިތް ހަމަނުޖެހޭކަން ފާޅުކުރުމުން، ރެފްރީ މުހައްމަދު ޝިފާން ވަނި އޭނާ ބެންޗުން ފޮނުވާލާފައެވެ.
މި މެޗާއެކު ލީގްގެ ފުރަތަމަ ބުރު ވަނީ ނިމިފައެވެ.