ގޯލްޑް ކަޕް 2024ގެ ފައިނަލް މެޗުގައި އައްޑޫގެ މައްޗަށް 2-0 ގެ ނަތީޖާއަކުން މޮޅުވެ، ބ. އޭދަފުށިން އެ މުބާރާތުގެ ޗެމްޕިއަންކަން ހޯދައިފި އެވެ.
މި މެޗު ކުޅުނީ 4000 އަށް ވުރެ ގިނަ ސަޕޯޓަރުންގެ ކުރިމަތީގައި ގަލޮޅު ދަނޑުގަ އެވެ.
މެޗު ފެށުމުގެ ކުރިން މުބާރާތުގެ ޗެމްޕިއަން ޓީމަށް ދޭ ތަށި ލޯންޗު ކުރި އެވެ.
ތަށި ހިފައިގެން ގަލޮޅު ދަނޑަށް ނިކުތީ ރާއްޖޭގެ ފުޓްބޯޅައިގެ އެންމެ ކާމިޔާބު ކުޅުންތެރިޔާ އަލީ އަޝްފާގް (ދަގަނޑޭ) އެވެ.
އޭދަފުށީގެ ފުރަތަމަ ލަނޑު ޖެހީ ކުރިން ފުރަތަމަ ޑިވިޝަނުގައި ވެސް ވާދަކޮށްފައިވާ މުހައްމަދު ފާސިރު (ފާއްޓޭ) އެވެ. މި ލަނޑު ޖެހުނީ ހަމްޒާ މުހައްމަދު (ހަމްޕު) ނެގި ކޯނަރެއް ފާއްޓޭ ބޮލުން ފޮނުވާލައިގެންނެވެ. ފުރަތަމަ ހާފުގައި އޭދަފުށިން ނެގި ގިނަ ކޯނަރުތަކުން އައްޑޫގެ ގޯލަށް ނުރައްކާކޮށްފައިވެ އެވެ.
މެޗުގެ 90 ވަނަ މިނެޓުގައި އޭދަފުށީގެ ދެވަނަ ލަނޑު ޖެހީ އަލީ ފާސިރު (ސެންޓޭ) އެވެ. އައްޑޫގެ ޑިފެންޑަރުން ހަމްޕުއަށް ސަމާލުކަން ދިނުމުން، ސެންޓޭއަށް ލިބުނު ފުރުސަތުގައި އޭނާ ބޯޅަ ގޯލްގެ ތެރެއަށް ފޮނުވާލީ އެވެ.
މި ކާމިޔާބީއާއެކު އޭދަފުށިން ވަނީ ގޯލްޑް ކަޕް 2024ގެ ޗެމްޕިއަންކަން ހޯދައި، އައްޑޫގެ އުއްމީދުތައް ފުނޑުފުނޑުކޮށްލާފަ އެވެ.
މި ކާމިޔާބީއަކީ އޭދަފުށީގެ ފުޓްބޯޅަ ތާރީހުގައި އެންމެ ފާހަގަކޮށްލެވޭ ކާމިޔާބެވެ.