ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި 90 ޕްލަސްއިން އިންތިޒާމު ކޮށްގެން ބޭއްވި ގޯލްޑް ކަޕް 2024ގެ ފައިނަލް މެޗު މިރޭ ގަލޮޅު ދަނޑުގައި ކުޅޭނެ އެވެ.
މި މެޗުގައި ބައްދަލުކުރާނީ އައްޑޫ ސިޓީ އާއި ބ. އޭދަފުށި ޓީމެވެ.
ފައިނަލް މެޗުގެ ޓިކެޓް އިއްޔެ ހަވީރު ގަލޮޅު ދަނޑުން ވިއްކަން ފެށުމާ އެކު ގަޑިއިރެއްގެ ތެރޭގައި ޓިކެޓްތައް ވަނީ ވިކި ހުސްވެފަ އެވެ.
މިރޭ 9:00 ގައި ފެށުމަށް ހަމަޖެހިފައިވާ މި މެޗަކީ މި ފަހުގެ ތާރީހެއްގައި ގަލޮޅު ދަނޑަށް އެންމެ ގިނަ ސަޕޯޓަރުން ވަންނާނެ މެޗު ކަމަށް ލަފާކުރެވެ އެވެ.
މި މުބާރާތުގެ ފައިނަލާ ހަމައަށް އައްޑޫ ސިޓީ ދަތުރުކުރީ ކުޅުނު އެއްވެސް މެޗަކުން ބަލިނުވެ، ސެމީ ފައިނަލްގައި 2-0 އިން ރ. އަލިފުށި ބަލިކޮށްގެންނެވެ. އޭދަފުށި ފައިނަލަށް ދިޔައީ ސެމީ ފައިނަލްގައި މާލެ ސިޓީގެ މައްޗަށް 3-2 އިން ކުރިހޯދައިގެންނެވެ.
މުޅި ރާއްޖެއަށް ހުޅުވާލައިގެން ބޭއްވި މި މުބާރާތުގައި ޖުމްލަ 17 ޓީމެއް ވާދަކުރި އެވެ.
މި މުބާރާތަކީ ދިވެހިންގެ މެދުގައި ފުޓްބޯޅައަށް އޮންނަ ލޯބި އިތުރުކޮށް، އަލުން ގަލޮޅު ދަނޑަށް ސަޕޯޓަރުން ވެއްދުމުގެ އަމާޒުގައި ބޭއްވި މުބާރާތެކެވެ. މި މުބާރާތުގެ ފައިނަލް މެޗާއެކު ފުޓްބޯޅައަށް އާދިރުމެއް ލިބި، ކުޅިވަރުގެ ރޫހު އާލާވެގެންދާނެ ކަމަށް ފުޓްބޯޅައަށް ލޯބިކުރާ މީހުން ދެކެ އެވެ.