ނައިންޓީ ޕްލަސް ގޯލްޑް ކަޕް ފުޓުބޯޅަ މުބާރާތުގައި ކ. މާފުއްޓާއި ބ. އޭދަފުށީ ޓީމު ކުޅުނު މެޗުގައި މާފުށީގެ ކެޕްޓަން އަހްމަދު އަބްދުއްސައްތާރަށް އޭދަފުށީގެ ގޯލްކީޕަރު އަލީ އަޖުފާން އަމްޖަދު ކުރި ނުރައްކާތެރި ފައުލާ ގުޅިގެން މާފުށީ ސަޕޯޓަރުން ދަނޑުމައްޗަށް އަރައި ހިންގި ހަމަނުޖެހުމުގެ ސަބަބުން، މުބާރާތުގެ ޑިސިޕްލިނަރީ ކޮމިޓީން މާފުއްޓާ ދެކޮޅަށް ފިޔަވަޅު އަޅައިފި އެވެ.
މެޗުގެ އެންމެ ފަހު މިނެޓުގައި އޭދަފުށީ ގޯލްކީޕަރު އަލީ އަޖުފާން އަމްޖަދުގެ ނުރައްކާތެރި ފައުލަކާ ގުޅިގެން، މާފުށީ ޓީމުގެ ސަޕޯޓަރުން ކުއްލިއަކަށް ދަނޑަށް އަރައި، ސެކިއުރިޓީ ފެންސު ވައްޓާލި އެވެ.
ޑިސިޕްލިނަރީ ކޮމިޓީގެ ނިންމުމުގައި، މާފުށީ ޓީމަށް 3،000 ރުފިޔާގެ ޖޫރިމަނާއެއް ކަނޑައަޅައި އޭގެއިތުރުން އިތުރު އިންޒާރެއް ވެސް ދީފައިވެ އެވެ. ޖޫރިމަނާ ފައިސާ މާފުށީ ޓީމު ދެން އެންމެ އަވަހަށް ކުޅޭ މެޗުގެ ކުރިން ދައްކަންޖެހޭ ކަމަށް ކޮމިޓީން ނިންމާފައިވެ އެވެ.
ކޮމިޓީގެ އިތުރު އިންޒާރެއްގައި، މާފުށި ޓީމުގެ ސަޕޯޓަރުން ނުވަތަ އޮފިޝަލުން މިފަދަ ކަމެއް ދެވަނަ ފަހަރަށް ތަކުރާރުކޮށްފިނަމަ، ޖޫރިމަނާގެ އަދަދު އެތައް ގުނައަކުން އިތުރުކުރާނެ ކަމަށްވެސް ވަނީ އަންގާފަ އެވެ.
މާފުށީގެ ކެޕްޓަން އަހްމަދު އަބްދުއްސައްތާރަށް އޭދަފުށީގެ ގޯލްކީޕަރު އަލީ އަޖުފާން އަމްޖަދު ކުރި ނުރައްކާތެރި ފައުލާ ގުޅިގެން ކޮމިޓީން ވަނީ ނައިންޓީ ޕްލަސް ގޯލްޑް ކަޕުން ބާއްވާ އެންމެހާ މުބާރާތްތަކުން އޭދަފުށީގެ ގޯލްކީޕަރު އެއް އަހަރު ދުވަހަށް ސަސްޕެންޑުކޮށް 5،000 ރުފިޔާގެ ޖޫރިމަނާއެއް ދައްކަން އަންގާފަ އެވެ.
