ހަތްހާހަށްވުރެ ގިނަ ދަރިވަރުންނާއެކު މިއަހަރުގެ ޖީސީއީ އޯލެވެލް އިމްތިހާން ރާއްޖޭގައި ފަށައިފި އެވެ. އޯލެވެލްގައި މިއަދު ދަރިވަރުން ހަދާނީ އިސްލާމް މާއްދާ އެވެ.
މިއަހަރު ރާއްޖެއިން މުޅި ޖުމްލަ 7،032 ދަރިވަރުން ޖީސީއީ އޯލެވެލް އިމްތިހާނާއި އެސްއެސްސީ އިމްތިހާނުގައި ބައިވެރިވާނެއެވެ. އިމްތިހާންތައް 235 ސެންޓަރެއްގައި ކުރިއަށްދާނެއެވެ. އެއީ އަމިއްލަ 41 ސެންޓަރާއި، 194 ސްކޫލެއްގައެވެ. މީގެ އިތުރުން ސްރީލަންކާގެ ވެރިރަށް ކޮލަމްބޯގައިވެސް ދިވެހި އިސްލާމްގެ އިމްތިހާން ބޭއްވުމަށް އެޑިއުކޭޝަން މިނިސްޓްރީން ވަނީ ހަމަޖައްސާފަ އެވެ. ކޮލަމްބޯގައި 12 ކުއްޖަކު އެސްއެސްސީ އިމްތިހާނުގައި ހަދާނެ އެވެ.
އޯލެވެލް އިމްތިހާން މިއަދު ފަށާފައިވާއިރު، މިއަހަރު އެގާރަ ބާރައިގެ ދަރިވަރުންވެސް އިމްތިހާން ހަދާނީ މި ދުވަސްވަރު އެވެ. އޭ ލެވެލް އިމްތިހާންތައް ފެށުމަށް ހަމަޖެހިފައިވަނީ، މިމަހުގެ 10 ވަނަ ދުވަހުއެވެ. މިމަހު ފަށާ އޭ ލެވެލް އިމްތިހާނުގައި 334 ދަރިވަރުން ބައިވެރިވާނެ އެވެ. މިއީ އެޑިއުކޭޝަން މިނިސްޓްރީން އޯ ލެވެލް އަދި އޭލެވެލް އިމްތިހާން އެއް ދުވަސްވަރެއްގައި ބޭއްވުމަށް ނިންމި ނިންމުމާ ގުޅިގެން މިދުވަސްވަރު އިމްތިހާން ބާއްވާ ފުރަތަމަ ފަހަރުވެސް މެ އެވެ. މީގެ ކުރިން އޭލެވެލް އިމްތިހާން ހަދަމުން ގޮސްފައިވަނީ މޭ ޖޫން އަދި ޖެނުއަރީގަ އެވެ.
އޯލެވެލް މިއަދު ފަށާފައިވާއިރު އަންނަ ނޮވެމްބަރު މަހުގެ 16 އާ ހަމަޔަށް ޓެސްޓުތައް ކުރިއަށްދާނެ އެވެ. އަދި އޭލެވެލް ނިމޭނީ ނޮވެމްބަރު މަހުގެ އަށް ވަނަ ދުވަހުއެވެ.
ދަރިވަރުންތަކެއް: އެސްއެސްސީ އިމްތިހާނުތަކާއި ގުޅިގެން ފެތުރިފައިވަނީ ދޮގު ވާހަކަތަކެއް. --