ތިމަރަފުށީގައި ގެއަކަށް ވަދެ މާރާމާރީ ހިންގި މީހުން ބަންދަށް

ތ. ތިމަރަފުށީގެ ގެއަކަށް ވަދެ މާރާމާރީ ހިންގި މައްސަލައިގެ ތުހުމަތުގައި ހައްޔަރުކުރި މީހުން ބަންދުގައި ބޭތިއްބުމަށް ކޯޓުން އަމުރުކޮށްފި އެވެ.

ތިމަރަފުށީގެ ގެއަކަށް ފަސް މީހަކު ވަދެ މާރާމާރީ ހިންގި މައްސަލަ ރިޕޯޓްކުރީ އިއްޔެ މެންދުރުފަހު 1:27 ހާއިރު އެވެ.
މި މައްސަލައިގައި ކޯޓު އަމުރެއްގެ ދަށުން ހައްޔަރުކޮށްފައިވަނީ ތ. ތިމަރަފުށި، ޖަހާމުގުރިގެ، އަހްމަދު އަމީން (36އ) އާއި، ތ. ތިމަރަފުށި، ސަލްވާ، އަހްމަދު ޝަހުދީ (38އ) އާއި، ކ. މާލެ، ވ. ވަވަތް، މުހައްމަދު ރައޫފު (54އ) އާއި، ތ. ތިމަރަފުށި، ގުލްބަކާވިލާ، އަބްދުﷲ އަޝްރަފް (39އ) އަދި ތ. ތިމަރަފުށި، ހިރި، އާސް އިބްރާހީމް (32އ) އެވެ.

މި މީހުންގެ ބަންދާ މެދު ގޮތެއް ނިންމުމަށް މިއަދު ކޯޓަށް ހާޒިރުކުރުމުން އަޝްރަފާއި، އާސް އަދި މުހައްމަދު ރައޫފްގެ ބަންދަށް ކޯޓުން ވަނީ 10 ދުވަސް ދީފަ އެވެ. އަހްމަދު އަމީން ބަންދަށް ހަތް ދުވަސް އަދި އަހްމަދު ޝަހްދީގެ ބަންދަށް ފަސް ދުވަސް ވެސް ކޯޓުން ދީފައިވެ އެވެ.

ފުލުހުން ގެންދަނީ މި މައްސަލަ އިތުރަށް ތަހުގީގު ކުރަމުންނެވެ.