ރާއްޖޭގެ ފެނާ ނަރުދަމާއާ ސާފުތާހިރުކަމާ ގުޅޭ، ގްލޯބަލް އެނަލައިސިސް އެންޑް އެސެސްމަންޓް އޮފް ސެނިޓޭޝަން އެންޑް ޑްރިންކިން ވޯޓާ (ގްލާސް) ރިޕޯޓް ތައްޔާރުކުރުމަށް މަޝްވަރާ ބައްދަލުވުމެއް ފަށައިފި އެވެ.
ގްލާސް ރިޕޯޓަކީ ފެނާއި ނަރުދަމާގެ ދާއިރާގެ މަސައްކަތް ކުރާ ފަރާތްތަކަށް ދާއިރާގެ އިންވެސްޓްމަންޓްމަންޓް ތަކާއި ފެނާއި ނަރުދަމާގެ ތަފާސް ހިސާބުތައް އެއް ޕްލެޓްފޯމަކުން ލިބޭނެ ގޮތް ހެދުމަށް ތައްޔާރުކުރާ ރިޕޯޓެކެވެ. މިއަދު ފެށި ބައްދަލުވުން ކުރިއަށްދާނީ މާދަމާގެ ނިޔަލަށެވެ.
ބައްދަލުވުން ފެށުމަށް މިއަދު ސެންޓަރަލް ހޮޓެލްގައިބޭއްވި ރަސްމިއްޔާތުގައި އެންވަޔަރަންމަންޓް މިނިސްޓްރީގެ ސްޓޭޓް މިނިސްޓަރު އަބްދުލް މަތީން ވިދާޅުވީ، ގްލާސް ފަދަ ރިޕޯޓެއް ތައްޔާރުކުރާ އިރު، ބައިނަލްއަގުވާމީ ފަރާތްތަކުން ރާއްޖެއަށް އައިސް އެ ރިޕޯޓް ތައްޔާރުކުރާ ފަރާތްތަކަށް ތަމްރީނު ދިނުމަކީ ރާއްޖެއަށޤ ލިބޭ ވަރަށް ބޮޑު ފަހުރެއް ކަމަށެވެ. އަދި އެއީ ރިޕޯޓު ތިތުރަށް ފުރިހަމަވެގެންދާނެ ކަމެއް ކަމަށައި، އެ ރިޕޯޓުން މިހާރު ސަރުކާރުން ވޭތުވެ ދިޔަ ތިން އަހަރު ފެނާއި ނަރުދަމާގެ ދާއިރާގައި މަސައްކަތް ކޮށްފައިވާ ގޮތް ފެނިގެންދާނެ ކަމަށެވެ.
ސަރުކާރު ފެށުނު ފަހުން 40 ރަށެއްގައި ނަރުދަމާ ގާއިމްކުރަން މަސައްކަތް ފަށާފައިވާކަން ފާހަގަކުރައްވައި މަތީން ވިދާޅުވީ، އަމާޒަކީ 2018 ނިމޭއިރު އާބާދީގެ 75 ޕަސެންޓަށް ރައްކާތެރި ނަރުދަމާގެ ހިދުމަތް ފޯރުކޮށްދޭނެ ކަމުގެ ޔަގީންކަން ހޯދައިދިނުން ކަމަށެވެ.
މިއަދު ފެށި މަޝްވަރާ ބައްދަލުވުމުގައި ތިމާވެށީގެ ދައިރާގެ ބޭރުގެ ބައެއް ފަރާތްތަކާއި، ކަމާ ގުޅޭ އެކި އިދާރާތަކުގެ މުއައްސަސާތަކުން ވަނީ ބައިވެރިވެފަ އެވެ.