އެކި ބާވަތުގެ އަނިޔާކޮށްގެން މިއަހަރުގެ މިހާތަނަށް ޖެންޑާ މިނިސްޓްރީއަށް މާލެއިން އެކަނިވެސް 400 އަށްވުރެ ގިނަ މައްސަލަ ހުށަހަޅާފައިވާކަމަށް ޖެންޑަ މިނިސްޓްރީން ހާމަކޮށްފި އެވެ. މުޅި ރާއްޖެއިން ހުށަހެޅި މައްސަލަތަކުގެ އަދަދު 2،000 އާ ކައިރި ކުރެ އެވެ.
ކުޑަކުދިންނަށް ކުރާ އަނިޔާ އާއި ގެވެށި އަނިޔާގެ މައްސަލަތައް އަހަރެއް އަހަރަކަށް އިތުރުވަމުންދާއިރު، މި ފަހަކަށް އައިސް އެ އަދަދު ހީވެސް ނުކުރާ މިންވަރަށް އިތުރުވަމުންދާކަން އެ މިނިސްޓްރީން ވަނީ ފާހަގަކޮށްފަ އެވެ.
"އަވަސް" އަށް ދެއްވި އިންޓަވިއުއެއްގައި ޖެންޑަ މިނިސްޓްރީގެ ސީނިއާ އެގްޒެކެޓިވް އާމިނަތު ޝަރީފް ވިދާޅުވީ، މިދިޔަ އަހަރު އެ މިނިސްޓްރީއަށް މުޅި ރާއްޖެއިން ހުށަހެޅި މައްސަލަތަކުގެ އަދަދު 1919 އަށް އަރާއިރު، މިއަހަރުގެ މިހާތަނަށް މާލެއިން އެކަނިވެސް 500 އެއްހާ މައްސަލަ ހުށަހަޅާފައިވާ ކަމަށެވެ.
މިދިޔަ އަހަރު ޖިންސީ ގޯނާގެ މައްސަލަ ތަކުގެ ގޮތުގައި އެ މިނިސްޓްރީއަށް ހުށަހަޅާފައިވަނީ، 262 މައްސަލައެވެ. އަދި ޖިސްމާނީ އަނިޔާގެ 226 މައްސަލައެއް މިދިޔަ އަހަރު ހުށަހަޅާފައިވާއިރު، ނަފްސާނީ ގޯނާގެ ގޮތުގައި ހުށަހަޅާފައިވަނީ 55 މައްސަލައެކެވެ. މީގެ އިތުރުން އިހުމާލުގެ 198 މައްސަލައެއްވެސް މިދިޔަ އަހަރު ޖެންޑާ އަށް ވަނީ ހުށަހަޅާފަ އެވެ.
މިނިސްޓްރީން ބުނީ، މިއަހަރުގެ މިހާތަނަށް އެއްކުރެވިފައިވާ ތަފާސް ހިސާބުތަކަށް ބަލާއިރު، މި މައްސަލަތައް މިއަހަރު ވަރަށް ބޮޑަށް އިތުރުވަމުންދާ ކަމަށް ބެލެވިދާނެ ކަމަށެވެ. އެގޮތުން 18 އަހަރުން ދަށުގެ ކުޑަކުދިންނަށް ކޮށްފައިވާ ޖިސްމާނީ، ޖިންސީ އަދި ނަފްސާނީ މައްސަލަތަކުގެ ގޮތުގައި މާލެއިން އެކަނި މިހާތަނަށް އެ މިނިސްޓްރީއަށް 340 މައްސަލައެއް ހުށަހަޅާފައިވާ އިރު، 18 އަހަރުން މަތީގެ މީހުންގެ ކެޓަގަރީން 131 މައްސަލަ ވަނީ ހުށަހަޅާފަ އެވެ.