ރާއްޖޭގައި އިސްލާމިކް ފައިނޭންސް ޕްރޮޑަކްޓްތައް އިތުރު ކުރުމަށް ގުޅިގެން މަސައްކަތް ކުރުމަށް ސެންޓަ ފޯ އިސްލާމިކް ފައިނޭންސް (އެމްސީއައިއެފް) އިން މޯލްޑިވްސް ސެކިއުރިޓީ ޑިޕޮޒިޓަރީ ކޮމްޕެނީ އާއެކު ސޮއިކޮށްފި އެވެ.
މޫކައި ސުއިޓްސް ގައި މިއަދު ބޭއްވި ރަސްމިއްޔާތެއްގައި އެމްސީއައިއެފް ގެ ފަރާތުން އެއްބަސްވުމުގައި ސޮއިކުރެއްވީ މެނޭޖިން ޑިރެކްޓަރު އިބްރާހިމް ދީދީ އެވެ. ސެކިއުރިޓީ ޑިޕޮސިޓަރީގެ ފަރާތުން ސީއީއޯ ހަސަން މަނިކެވެ.
މި އެއްބަސްވުމުގެ ދަށުން، ރާއްޖޭގައި އިސްލާމިކް ކެޕިޓަލް މާކެޓް ތަރައްގީކޮށް ކުރިއެރުވުމަށް އެކުލަވާލަންޖެހޭ މާލީ ވަސީލަތްތަކާއި ޕްރޮޑަކްޓްތައް އެކުލަވާލުމާއި، ކުންފުނިތަކަށާއި ތަފާތު މަޝްރޫއުތަކަށް ބޭނުންވާ ފަންޑު ހޯދުމުގެ މަގު ތަނަވަސްކުރުން ހިމެނެ އެވެ.
މިއަދު ސޮއިކުރި އެއްބަސްވުމާ ގުޅިގެން އެމްއެސްޑީސީގެ ސީއީއޯ ހަސަން މަނިކު ވިދާޅުވީ، މި އަހަރު ތެރޭގައިވެސް 50 އެއްހާ ކުންފުނިތަކުގެ ކޮންޓްރޯލިން ޝެއާހޯލްޑަރުންނާ ބައްދަލުކޮށް ބެންކް މެދުވެރިކޮށް ފައިނޭންސް ހޯދުމާއި ކެޕިޓަލް މާކެޓް މެދުވެރިކޮށް ހެޔޮ އަގުގައި ފައިނޭންސް ހޯދުމަށް ކުރެވިދާނެ މަސައްކަތްތަކާ ބެހޭ މައުލޫމާތު ދީފައިވާ ކަމަށެވެ. އެހެންކަމުން މިއަދު ސޮއިކުރި އެއްބަސްވުމުގެ ދަށުން އެމްސީއައިއެފްއާ ގުޅިގެން ގިނަ ބަޔަކަށް އެއް ފުރާޅެއްގެ ދަށުން ޝަރީއާ ކޮމްޕްލަޔަންޓް ޕްރޮޑަކްޓްތައް ފަރުމާކުރުމަށް ވަރަށް ގިނަ މަސައްކަތްތަކެއް ކުރެވިގެންދާނެ ކަމަށް މަނިކު ވިދާޅުވި އެވެ.
އެމްއެސްޑީސީ އަކީ ކެޕިޓަލް މާކެޓް މެދުވެރިކޮށް ފަންޑް ހޯދަން ބޭނުންވާ ކުންފުނިތައް މާކެޓާ ހަމަޔަށް ގެނެސްދިނުމަށް އެހީވެދޭ ކުންފުންޏެކެވެ.