ގާނޫނީ ވަކީލް ހުއްސުއް ސުއޫދަށް ރާއްޖޭގެ ކޯޓޫތަކުގައި ވަކާލާތު ނުކުރެވޭ ގޮތަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ނިންމި ނިންމުން ބާތިލްކުރުމަށްފަހު ސުއޫދަށް އަލުން އެ ހުއްދަ ދީފި އެވެ. ވަކާލާތުކުރުމުގެ ހުއްދަ ސުއޫދަށް ދީފައިވާކަން އިއުލާންކޮށްފައިވަނީ ޑީޖޭއޭ އިން މިރޭ ނެރުނު ބަޔާނެއްގަ އެވެ.
ޑީޖޭއޭ އިން ސުއޫދުގެ ވަކާލާތުކުރުމުގެ ހުއްދަ ބާތިލްކުރީ، ކޯޓުތަކުގެ ހުރުމަތް ކަނޑަމުންދާ މައްސަލަ ބަލައި، އެމައްސަލާގައި ވަކިގޮތެއް ނިމެންދެން، ރާއްޖޭގެ ކޯޓުތަކުގައި ވަކާލާތުކުރުން ވަގުތީ ގޮތުން މަނާކުރުމަށް ދިވެހިރާއްޖޭގެ ސުޕްރީމް ކޯޓުން މިދިޔަ މަހުގެ 31 ވަނަ ދުވަހު ނިންމި ނިންމުމާއި ގުޅިގެންނެވެ. ސުއޫދާއެކު ގާނޫނީ ވަކީލު އަލީ ހުސައިންގެ ހުއްދަ ވެސް ވަނީ ބާތިލްކޮށްފަ އެވެ. އޭގެ ފަހުން އަލީ ހުސައިންއަށް ވަކާލާތު ކުރުމުގެ ހުއްދަ އަދި ދޫނުކުރެ އެވެ.
ޑީޖޭއޭއިން ނެރުނު ބަޔާނުގައި ބުނީ، މި އަހަރުގެ އޮކްޓޯބަރު 31 ވަނަ ދުވަހުން ފެށިގެން ރާއްޖޭގެ ކޯޓުތަކުގައި ވަކާލާތުކުރުން މަނާކުރެވުނު ސ. މީދޫ ހަސަންކާރިގެ އަލްއުސްތާޒް ހުސްނުއްސުއޫދަކީ 8 ނޮވެމްބަރު 2016 އިން ފެށިގެން ވަކާލާތުކުރުން މަނާކޮށްފައިވާ ފަރާތެއް ނޫންކަމަށް އަންގާ އިއުލާންކުރާ ކަމަށެވެ.
ވަކާލާތުކުރުމުގެ ހުއްދަ ވަގުތީގޮތުން ބާތިލުކުރުމާ ގުޅިގެން ސުއޫދު ވިދާޅުވެފައިވަނީ، ކޯޓްތަކުގެ ހުރުމަތް ރައްކާތެރިކުރުމަށް ސުޕްރީމް ކޯޓުން ކުރަމުންދާ މަސައްކަތްތަކަށް ފުރިހަމައަށް އެއްބާރުލުން ދެއްވާނެ ކަމަށެވެ.