އައްޑޫ ސިޓީ ހިތަދޫގެ އީދިގަލި ކުޅި ސަރަހައްދާއި ކޯއްޓޭ އިން ދަނޑުވެރިކަމަށް ދޫކޮށްފައިވާ ބިންތަކުގެކަންކަން ބެލެހެއްޓުން އީޕީއޭގެ ދަށަށް ބަދަލުކޮށް އެ ތަންތަނުގެ އެއްބަސްވުން އާ ކުރަން އަންގައިފި އެވެ. އެކަމަށް ދީފައި ވަނީ ތިން މަސްދުވަހުގެ މުއްދަތެކެވެ.
އީޕީއޭ އިން މިއަދު ނެރުނު އިއުލާނެއްގައި ބުނީ، ކޯއްޓޭ އާއި އީދިގަލި ކުޅި އަކީ ރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނުގެ ދަށުން ހިމާޔަތްކުރެވިފައިވާ ސަރަހައްދެއް ކަމަށާއި އެހެން ކަމުން އެ ބިންތަކުގެ އެއްބަސްވުންތައް އެ އެޖެންސީއަށް ބަދަލުކުރުމަށް ބޭނުންވާ ކަމަށެވެ.
އީޕީއޭ އިން ބުނި ގޮތުގައި އައްޑޫ ސިޓީ ކައުންސިލް އިދާރާ އާއި ހައުސިން މިނިސްޓްރީގެ ފަރާތުން އެ ސަރަހައްދުން ދޫކޮށްފައިހުރި ދަނޑުބިންތަކުގެ ވެރިފަރާތްތަކުން އެ ފަރާތްތަކުގެ އެއްބަސްވުންތަކާއި، ކަމާ ގުޅުންހުރި ލިޔުންތައް، މިއަދުން ފެށިގެން ތިން މަސްދުވަހުގެ ތެރޭގައި އެ އެޖެންސީއަށް ނުވަތަ އައްޑޫ ސިޓީ ހިތަދޫ، ކްލައިމެޓް ޗޭންޖް އެޑެޕްޓޭޝަން ޕްރޮޖެކްޓް އޮފީހަށް ހުށަހެޅުމަށް އެދޭ ކަމަށެވެ.
އީޕީއޭއިން ބުނީ، އެ ސަރަހައްދުތަކަކީ ހިމާޔަތް ކުރެވިފައިވާ ސަރަހައްދުތަކަކަށް ވުމުން، އާ އެއްބަސްވުމުގެ ދަށުން ދަނޑުވެރިކަން ކުރެވޭނީ ވަކި އުސޫލުތަކެއްގެ ދަށުން ކަމަށެވެ. އަދި އެ އުސޫލުތައް ވަރަށް އަވަހަށް އާ ކުރާނެ ކަމަށް ވެސް އީޕީއޭ އިން ބުންޏެވެ.