ފަތުރުވެރިންނަށް ރާއްޖޭން ލިބެންހުރި ބޭސްފަރުވާގެ ހިދުމަތްތައް ކިޔައިދީ، އަވަށްޓެރި ގައުމުތަކާއި ރާއްޖޭގެ ހޮސްޕިޓަލްތަކާއި ކްލިނިކް ތަކުން ލިބެންހުރި ބޭސްފަރުވާގެ މައުލޫމާތު އާންމުންނަށް ފޯރުކޮށްދިނުމަށް އެމްވީ މެޑިކަލްސް އާއި މެޑްލައިފް އޭޝިއާ ގުޅިގެން އިންތިޒާމްކުރި ހެލްތު އެންޑް މެޑިކަލް އެކްސްޕޯ ފަށައިފި އެވެ. އާޓް ގެލެރީގައި މިއަދު ފެށި އެ އެކްސްޕޯ ކުރިއަށްދާނީ 26 ގެ ނިޔަލަށެވެ.
ރާއްޖޭގައި ފުރަތަމަ ފަހަރަށް ބާއްވާ މި އެކްސްޕޯއާ ގުޅިގެން، އެކްސްޕޯ އިންތިޒާމްކުރާ އެމްވީ މެޑިކަލްސް އިން ބުނީ، މީގެ ފަހުން ކޮންމެ އަހަރަކުވެސް އެކްސްޕޯ ބާއްވާނެ ކަމަށެވެ.
އިންޑިއާ އާއި ލަންކާގެ މަޝްހޫރު ބައެއް ހޮސްޕިޓަލްތަކުން ބައިވެރިވި އެ އެކްސްޕޯއާ ގުޅޭ ގޮތުން، އެކްސްޕޯގެ މައި ސްޕޮންސާ އޭޑީކޭ އިން ބުނީ، ރާއްޖޭން ވެސް ދުނިޔޭގެ ފެންވަރުގެ ރަނގަޅު ފަރުވާތައް ލިބެންހުރި އިރު، އެ ކަންކަމުގެ މައުލޫމާޓު އާންމުންނަށް ނޭނގޭ ކަމީ ރާއްޖޭގެ ސިއްހީ ދާއިރާއަށް ލިބިފައިވާ ވަރަށް ބޮޑު ގޮންޖެހުމެއް ކަމަށެވެ. އަދި އިންޑިއާ ލަންކާ ފަދަ ގައުމުތަކަށް ބޭސް ފަރުވާއަށް ދާއިރު އެތަންތަނުން ވެސް އެންމެ ރަނގަޅު ފަރުވާދޭ ހޮސްޕިޓަލްތައް އެނގިފައި އޮތުމަކީ މުހިއްމު ކަމެއް ކަމަށް ގަބޫލުކުރާ ކަމަށާއި މިއަދު ފެށި އެކްސްޕޯއިން އެ މަގްސަދު ހާސިލްވާނެ ކަމަށެވެ.