ފާއިތުވި ތިން އަހަރު ތެރޭ ފެނާއި ނަރުދަމާގެ ނިޒާމަށް ރައީސް ޔާމީން ގެންނެވި ކުރިއެރުމަކީ ރާއްޖޭގެ ތާރީހުގައި ވެސް ފެނިފައި ނުވާ ވަރުގެ ކުރިއެރުމެއް ކަމަށާއި، މި ސަރުކާރުން މިހާތަނަށް ނަރުދަމާ ގާއިމްކޮށްދިން ދިހަ ރަށުގެ މަސައްކަތަށް އެކަނިވެސް 500 މިލިއަން ރުފިޔާ ހަރަދުވެފައިވާ ކަމަށް އެންވަޔަރަމަންޓް މިނިސްޓަރު ތޯރިގް އިބްރާހިމް ވިދާޅުވެއްޖެ އެވެ.
ސަރުކާރަށް ތިން އަހަރު ފާހަގަ ކުރުމުގެ ގޮތުން އެންވަޔަރަމަންޓް މިނިސްޓްރީގައި މިއަދު ބޭއްވި ހަފްލާއެއްގައި މިނިސްޓަރު ތޯރިގް އިބްރާހިމް ވިދާޅުވީ، ވޭތުވެދިޔަ ތިން އަހަރަކީ ރާއްޖެއަށް އެކި ދާއިރާތަކުން ވަރަށް މުހިއްމު އަދި ބިނާކުރުވަނިވި ތަރައްގީ ލިބުނު ތިން އަހަރު ކަމަށާއި ފެނާއި ނަރުދަމާގެ ދާއިރާއަށް ވެސް އައިސްފައިވަނީ ރާއްޖެ މީގެ ކުރިން ދެކެފައި ނެތް ވަރުގެ ތަރައްގީއެއް ކަމަށެވެ. 2013 ވަނަ އަހަރު ރައީސް ޔާމީން ވެރިކަމާ ހަވާލުވެވަޑައިގެންނެވި އިރު މުޅި ރާއްޖޭގައި ނަރުދަމާ ގާއިމްކުރެވިފައި އޮތީ 31 ރަށަކަށް ކަން ފާހަގަކުރައްވައި މިނިސްޓަރު ވިދާޅުވީ، މި ސަރުކާރު އައި ފަހުން 10 ރަށެއްގައި ނަރުދަމާ މުޅިން ގާއިމްކޮށް، 21 ރަށެއްގެ ނަރުދަމާގެ މަސައްކަތް މިހާރު ކުރިއަށްދާ ކަމަށެވެ. އަދި ވަރަށް އަވަހަށް އިތުރު 11 ރަށެއްގެ ނަރުދަމާ މަސައްކަތް ފަށާނެކަން ވެސް މިނިސްޓަރު ފާހަގަކުރެއްވި އެވެ.
މިނިސްޓަރު ވިދާޅުވީ، ސަރުކާރުން މަސައްކަތް ކުރަނީ ކުރިއަށް އޮތް ދެ އަހަރަުގެ ތެރޭގައި އާބާދީގެ 75 ޕަސެންޓަށް ނަރުދަމާ ގާއިމްކޮށްދިނުމަށް ކަމަށެވެ. އަދި މިހާރު އެ މިނިސްޓްރީން މަސައްކަތް ކުރާ ސްޕީޑުގައި މަގްސަދާ ހަމަޔަށް ވާސިލުވެވޭނެ ކަމަށް ވެސް ތޯރިގް ވިދާޅުވި އެވެ.
" ރައީސް ޔާމީން ވެރިކަމަށް ވަޑައިގެންނެވި އިރު، ނަރުދަމާ ފޯރުކޮށްދެއްވާފަ އޮތީ އާބާދީގެ 37 ޕަސެންޓަށް. ނަމަވެސް މިހާރު ހާލަތު ބަދަލުވެއްޖެ. 2013 ވަނަ އަހަރުން ފެށިގެން މިހާތަނަށް 10 ރަށެއްގައި ނަރުދަމާ އަޅައި ނިމިފައިވޭ. މިއީ ގާތްގަނޑަކަށް 500 މިލިއަން ރުފިޔާ،" މިނިސްޓްރު ވިދާޅުވި އެވެ.
ފެނާއި ނަރުދަމާގެ ދާއިރާ އިތުރަށް ފުޅާކުރުމަށް ފެނާއި ނަރުދަމާގެ ގާނޫނެއް ޑްރާފްޓު ކުރުމަށް މިނިސްޓްރީން މަސައްކަތް ފަށާފައިވާކަމަށް ތޯރިގު ވިދާޅުވި އެވެ. އެފަދަ ގާނޫނެއް އެކުލަވާލުމުން ނަރުދަމާގެ ދާއިރާގެ ކަންކަން ހަރުދަނާ ގޮތެއްގައި ބެލެހެއްޓި، ދާއިރާ އިތުރަށް ތަރައްގީކުރުމަށް ދެމެހެއްޓެނިވި މަސައްކަތްތަކެއް ކުރެވިގެންދާނެ ކަމަށް އޭނާ ވިދާޅުވި އެވެ.
"ފެނުގެ ނިޒާމަށް ބަލާއިރު 2013ގެ ފަހުން 43 ރަށަކަށް މި ސަރުކާރުން މިވަނީ ހޯދައިދީފަ. 15 ރަށަކަށް ފެން ފޯރުކޮށްދިނުމުގެ މަސައްކަތް މިހާޜުވެސް ދަނީ ކުރިއަށް، އަދި 16 ރަށެއްގެ މަސައްކަތް ވަރަށް އަވަހަށް ފެށޭނެ،" ތޯރިގު ވިދާޅުވި އެވެ.
އޭނާ ވިދާޅުވީ ސަރުކާރުގެ އަމާޒަކީ 2018 ނިމޭއިރު އާބާދީގެ 70 ޕަސެންޓަށް ސާފު ފެން ލިބޭނެގޮތް ހެދުން ކަމަށެވެ.
މިއަދުގެ ރަސްމިއްޔާތުގައި އެ މިނިސްޓްރީގެ ފެނާއި ނަރުދަމާގެ ދާއިރާގައި މަސައްކަތްކުރާ މުވައްޒަފުންނަށް ވަނީ މަސައްކަތުގެ އަގު ވަޒަންކުރުމުގެ ގޮތުން ހަނދާނީ ލިޔުމެއް ވެސް ދީފަ އެވެ.