ސަރުކާރުގެ މެނިފެސްޓޯގައި ތައުލީމީ ދާއިރާއަށް ކަނޑައެޅި ލަނޑުދަނޑިތައް މުޅިން ހެން ހާސިލް ވެއްޖެ ކަމަށް އެޑިއުކޭޝަން މިނިސްޓްރީގެ ސްޓޭޓު މިނިސްޓަރު ޑރ. އަބްދުﷲ ނަޒީރު ވިދާޅުވެއްޖެ އެވެ.
ސަރުކާރަށް ތިން އަހަރު ފުރުން ފާހަގަކުރުމަށް އެޑިއުކޭޝަން މިނިސްޓްރީން މިރޭ އިސްކަންދަރު ސްކޫލުގައި ބޭއްވި ރަސްމިއްޔާތެއްގައި ޑރ. ނަޒީރު ވިދާޅުވީ، ފާއިތުވި ތިން އަހަރު ތެރޭ ރާއްޖޭގެ ތައުލީމީ ދާއިރާއަށް ތަފާތު ހެޔޮ ބަދަލުތަކެއް އައިސްފައިވާ ކަމަށެވެ. އެގޮތުން "އެއްވެސް ކުއްޖަކު ބާކީ ނުކުރުމުގެ" ސިޔާސަތުން ފެށިގެން މިދިޔަ އަހަރު ރާއްޖެއަށް އަލަށް ތައާރަފްކުރި މަސައްކަތްތެރިކަމުގެ ސްޓްރީމްތަކާއި ހަމަޔަށް އެޑިއުކޭޝަން މިނިސްޓްރީން ކޮށްފައިވަނީ މިހާތަނަށް ރާއްޖޭގެ ތައުލީމީ ދާއިރާއަށް އެއްފަހަރާ ނާންނަ ވަރުގެ ހެޔޮ ބަދަލުތަކެއް ގެނުވި މަސައްކަތްތަކެއް ކަމަށް ނަޒީރު ވިދާޅުވި އެވެ.
މިރޭގެ ރަސްމިއްޔާތުގައި އެޑިއުކޭޝަން މިނިސްޓްރީން ފާއިތުވި ތިން އަހަރުގެ ތެރޭގައި ކޮށްފައިވާ މަސައްކަތްތަކުގެ ތަފްސީލީ މައުލޫމާތު ވަނީ ހިއްސާކޮށްފަ އެވެ.
އެ މިނިސްޓްރީން ބުނީ މިދިޔަ އަހަރު އެ މިނިސްޓްރީން ކުރި އެންމެ މުހިއްމު އަދި ފާހަގަކޮށްލެވޭ މަސައްކަތުގެ ތެރޭގައި ޓީޗަރުންގެ ފެންވަރު ރަނގަޅު ކުރުމަށް ވަޒީފާގައި ތިބެގެން ޑިޕްލޮމާ އާއި ޑިގްރީއަށް ކިޔެވުމަށް ޓީޗަރުންނަށް ހުޅުވާލި ފުރުސަތުތައް ފާހަގަކޮށްލެވޭ ކަމަށެވެ. މީގެ އިތުރަށް ގްރޭޑް އެކެއް އަދި ހަތެއްގެ ދަރިވަރުންގެ ހެލްތު ސްކްރީނިން ޕްރޮގްރާމް ތައާރަފްކޮށް، ޕްރީ ސްކޫލް ތައުލީމުން ފެށިގެން ސްކޫލް ނިމުމާ ހަމަޔަށް ތައުލީމް ހިލޭކޮށް، ޒުވާނުންނަށް ފަސޭހައިން ވަޒީފާގެ ދާއިރާއިން ތަމްރީންވުމަށް ހުޅުވާލެވުނު ކޯހުގެ ފުރުސަތުތައް އޭނާ ފާހަގަ ކުރެއްވި އެވެ.
"ޒުވާނުން ހުނަރުވެރިކުރުމަށް 14 ދާއިރާއެއްގެ ތަމްރީން މިހާރުވެސް ކުރިއަށް އެބަ ގެންދަން، މިއީ ހުސް ވަޒީފާގެ ފުރުސަތު. މިއީ 8000 ވަޒީފާ. އެހެން ވީމާ މިއީވެސް ބޮޑު ކާމިޔާބީ އެއް،" އެޑިއުކޭޝަން މިނިސްޓްރީން ބުންޏެވެ.
މިނިސްޓަރު ޑރ. އާއިޝަތު ޝިހާމް ވިދާޅުވީ، ތައުލީމީ ދާއިރާއަށް ހެޔޮ ބަދަލުތަކެއް އައިސްފި ކަމުގެ ސިގްނަލް އެކި ގޮތްގޮތުން ލިބެމުންދާ ކަމަށެވެ. އެކަން ބެލެނިވެރިންގެ މޫނުމަތިންނާއި ބަސްތަކުން އެނގެމުންދާ ކަމަށާއި އެއީ އެ މިނިސްޓްރީއަށް ލިބޭ އެންމެ ބޮޑު ހިތްހަމަޖެހުން ކަމަށް މިނިސްޓަރު ވިދާޅުވި އެވެ.
މިރޭގެ ރަސްމިއްޔާތުގައި އެޑިއުކޭޝަން މިނިސްޓްރީގެ އެކި ދާއިރާތަކުގައި ވަޒީފާ އަދާކުރާ މުވައްޒަފުންގެ އަގު އަދާކުރުމުގެ ގޮތުން ހަނދާނީ ލިޔުން ވަނީ ދީފަ އެވެ.