އައްޑު ސިޓީ ހުޅުދޫ ގިރާ ސަރަހައްދު ވަށައިގެން ބޮޑު ހިލައިގެ ތޮއްޓެއް ލާން 22 މިލިއަން ރުފިޔާއަށް އާރު އާރު މޯލްޑިވްސް ޕްރައިވެޓް ލިމިޓެޑަށް ދީފި އެވެ.
މި މަޝްރޫއުގެ ދަށުން ހުޅުދޫގެ ގިރާ ސަރަހައްދުގައި 1000 މީޓަރުގެ ބޮޑު ހިލައިގެ ތޮށި ލުމަށް ؛؛؛ވަނީ ހަމަޖެހިފަ އެވެ. ތޮށި ލާން ނިންމާފައިވަނީ، ހުޅުދޫގެ ދެކުނުފަރާތުގައި 2008 ގައި ޖަހާފައިވާ 450 މީޓަރުގެ ތޮއްޓާއި ގުޅޭ ގޮތަށް އުތުރަށް އެއް ކިލޯމީޓަރުގެ ސަރަހަދެއްގަ އެވެ. މި މަސައްކަތުގެ ތެރޭގައި ކުރީގައި ލާފައިވާ ތޮށި މަރާމާތުވެސް ކުރާނެ އެވެ.
މިއަދު އެންވަޔަރަމަންޓް މިނިސްޓްރީގައި ބޭއްވި ރަސްމިއްޔާތެއްގައި ހުޅު މީދޫގެ ގޮނޑުދޮށް ހިމާޔަތްކުރުމުގެ މަޝްރޫއުގައި އެންވަޔަރަމަންޓް މިނިސްޓްރީގެ ފަރާތުން ސޮއިކުރެއްވީ މިނިސްޓަރު ތޯރިގް އިބްރާހިމް އެވެ. އާރްއާރް މޯލްޑިވްސްގެ ފަރާތުން މެނޭޖިން ޑިރެކްޓަރ ރަންޖިތް ސެންދެރާ އެވެ.
މިއަދުގެ ރަސްމިއްޔާތުގައި މިނިސްޓަރު ތޯރިގް ވިދާޅުވީ، ހުޅުދޫގައި ލުމަށް ހަމަޖެހިފައިވާ ބޮޑުހިލައިގެ ތޮއްޓަކީ މިއަހަރު ތެރޭގައި ހަވާލުކުރެވުނު މިފަދަ ހަވަނަ މަސައްކަތް ކަމުން މި ސަރުކާރުން ރަށްރަށުގެ ތިމާވެށި ރައްކާތެރިކުރުމަށް އިސްކަންދޭ މިންވަރު ހާމަވެގެންދާ ކަމަށެވެ.
ގޮނޑުދޮށް ހިމާޔަތްކުރުމުގެ މަޝްރޫއުތަކުގެ ތެރެއިން މިހާތަނަށް މުޅިން ނިމުނު މަޝްރޫއުތަކަށް އެކަނި ވެސް 199 މިލިޔަން ރުފިޔާ ހަރަދުވެފައިވެފައިވާކަން މިނިސްޓަރު ފާހަގަކުރެއްވި އެވެ. އަދި ވިދާޅުވީ، މިހާރުވެސް 181 މިލިއަން ރުފިޔާގެ ގޮނޑުދޮށް ހިމާޔަތްކުރުމުގެ މަޝްރޫއު ރާއްޖޭގެ އެކި ހިސާބުތަކުގައި ކުރިއަށްދާ ކަމަށެވެ.
ހުޅުދޫގެ ގޮނޑުދޮށް ހިމާޔަތްކުރުމުގެ މަޝްރޫއެއްގައި މިއަދު ސޮއިކޮށްފައިވާއިރު، އެރަށާ އެއްފަސްކޮށްފައިވާ މީދޫގެ ގޮނޑުދޮށް ހިމާޔަތްކުރުމުގެ މަޝްރޫއެއް ވެސް މިއަހަރުތެރޭގައި ފެށުމަށް ނިންމައި އެކަމުގެ ތައްޔާރީތައް ވަމުންދާ ކަމަށް އެ މިނިސްޓްރީން ބުންޏެވެ.