ސަރުކާރަށް ތިން އަހަރުފުރުން ފާހަގަކުރުމަށް ސަރުކާރުން ރާވައި އިންތިޒާމްކޮށްގެން މާދަމާރޭ ބާއްވަން ހަމަޖެހިފައިވާ، "ހަބޭސް 3" ޖަލްސާއަށް ޕީޕީއެމް އިން މާލޭގައި ބޭއްވި "އަސްލު" ޖަލްސާއަށްވުރެ ގިނަ މީހުން ޖަމާވާނެ ކަމަށް ލަފާކުރެވޭ ކަމަށް ޓޫރިޒަމް މިނިސްޓަރު އަދި ޕީޕީއެމްގެ ނައިބު ރައީސް މޫސާ ޒަމީރު ވިދާޅުވެއްޖެ އެވެ.
ސަރުކާރަށް ތިން އަހަރު ފުރުން ފާހަގަ ކުރަން ބާއްވާ ހަރަކާތްތަކުގެ މައުލޫމާތު ދިނުމަށް މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ޒަމީރު ވިދާޅުވީ، މާދަމާރޭ އަލިމަސް ކާނިވަލުގައި ސަރުކާރުން ބާއްވާ ޖަލްސާއަކީ ޕީޕީއެމުން ބާއްވާ ހަރަކާތެއް ނޫން ކަމަށާއި އެހެންކަމުން އެ ޖަލްސާގައި ގިނަ އަދަދެއްގެ މުވައްޒަފުންނާއި ކުންފުނިތަކުގެ ވެރިން ބައިވެރިވެވަޑައިގަންނަވާނެ ކަމަށެވެ. މި ސަރުކާރު އައުމަށްފަހު ފާއިތުވި ތިން އަހަރުގެ ތެރޭގައި ސަރުކާރުގެ އިދާރާތަކާއި މުއައްސަސާ، ކުންފުނިތަކަށް ލިބުނު ކުރިއެރުމާއި ކާމިޔާބީ ފާހަގަކުރާ ރަސްމީ ޖަލްސާއެއް އެ ހަރަކާތް ވާތީ، އެ ޖަލްސާއަށް މުވައްޒަފުން އަންނާނެ ކަމާ މެދު ޝައްކެއް ނެތް ކަމަށް ޒަމީރު ވިދާޅުވި އެވެ. އެހެންކަމުން ޕީޕީއެމްގެ ބޮޑު ޖަލްސާއަށްވުރެ ވެސް މާދަމާ ރޭގެ ޖަލްސާއަށް އަންނަ މީހުންގެ އަދަދު ގިނަވާނެ ކަމަށް ޒަމީރު ލަފާކުރެއްވި އެވެ.
އޭނާ ވިދާޅުވީ މާދަމާރޭގެ ޖަލްސާއަށް ތައްޔާރުވަނީ 12،000 އަށްވުރެ ގިނަ މީހުންނަށް އެކޮމޮޑޭޓްކުރެވޭނެ ގޮތަށް ބަލައިގެން ކަމަށެވެ.
"ޕާޓީ އިވެންޓެއް ނޫން ވީމަ ފަހަރެއްގަ ކުރިއަށްވުރެ މީހުން ގިނަވެސް ވާނެ ކަމަށް ދެކެނީ. ޕާޓީގެ އިވެންޓެއް ވެއްޖިއްޔާ މި އަންނަނީ ޕާޓީގެ މެންބަރުންނާއި ޕާޓީއަށް ހެޔޮ އެދޭ ފަރާތްތަކުން، ނަމަވެސް މާދަމާރޭގެ ޖަލްސާގައި ސަރުކާރުގެ މުއައްސަސާތަކާއި އޮފީސްތަކާއި ކުންފުނިތަކުންވެސް ގިނަ އަދަދެއްގެ މުވައްޒަފުން ބައިވެރިވާނެ. އެހެންވީމަ ހީވަނީ ކުރިއަށްވުރެވެސް މިފަހަރު ގިނަވާނެ ހެން މީހުން،" ޒަމީރު ވިދާޅުވި އެވެ.
މާދަމާރޭ ބާއްވާ ޖަލްސާއަށް ދިއުމަށްވެސް މުވައްޒަފުންނަށް ބިރުދައްކައި، އިންޒާރުދޭ ކަމަށް ބުނެ އެކި ފަރާތްތަކުން ދައްކާ ވާހަކަތަކާ ގުޅިގެން ޒަމީރު ވިދާޅުވީ، ސަރުކާރުގެ ކާމިޔާބީގެ ފަހަތުގައި ތިބީ ސިވިލްސާވަންޓުން ކަމަށާއި ސަރުކާރުގެ އޮފީސްތަކުގެ މުވައްޒަފުން ލައްވައި ގަދަކަމުން މަސައްކަތްކުރުވާ އުސޫލެއް ރާއްޖޭގައި ގެންގުޅޭކަން އެނގިވަޑައިނުގަންނަވާ ކަމަށެވެ. އަދި އެއްވެސް މުވައްޒަފަކަށް ޖަލްސާއަށް އަންނަން މަޖުބޫރެއް ނޯންނާނެ ކަމަށް ވެސް ޒަމީރު ވިދާޅުވި އެވެ. އޭނާ ވިދާޅުވީ، މާދަމާރޭގެ ޖަލްސާއަކީ ޕާޓީ ޕްރޮމޯޓްކުރާ އިވެންޓެއް ނޫން ކަމަށާއި، އެއީ ސަރުކާރުގެ މުއައްސަސާތަކާއި ކުންފުނިތަކުން ހޯދި ކާމިޔާބީތައް ފާހަގަކޮށް އެކަމުގައި ޝާމިލުވާ މުވައްޒަފުންގެ އަގު ވަޒަންކުރާ ޖަލްސާއެއް ކަމަށެވެ.
ސަރުކާރަށް ތިން އަހަރުފުރުން ފާހަގަކުރާ ބޮޑު ޖަލްސާ މާދަމާރޭ ކާނިވާ ސަރަހައްދުގައި ބާއްވަން ނިންމާފައިވާއިރު، ތިން އަހަރުގެ ކާމިޔާބީ ފާހަގަކުރުމުގެ ވަކިވަކި އިވެސްޓްތަކެއް މިހާރުވެސް ސަރުކާރުގެ އޮފީސްތަކާއި ކުންފުނިތަކުން ދަނީ ބާއްވަމުންނެވެ.