ރާއްޖޭގެ ސިއްހީ ދާއިރާ މި ދަނީ އިންގިލާބީ ބަދަލަކަށް: ރައީސް

ރާއްޖޭގެ ސިއްހީދާއިރާ މިސްރާބު ޖަހާފައިވަނީ އިންގިލާބީ ބޮޑު ބަދަލަކާ ދިމާލަށް ކަމަށާއި، އެ ބަދަލުތަކުގެ ފައިދާ މިހާރު ވެސް ދިވެހި ހުރިހާ ރައްޔިތުންނަށް ލިބެން ފަށައިފި ކަމަށް ރައީސުލް ޖުމްހޫރިއްޔާ އަބްދުﷲ ޔާމީން މިރޭ ވިދާޅުވެއްޖެ އެވެ.

އައިޖީއެމްއެޗްގައި އަލަށް ފެށި ފަސް ހިދުމަތެއް އިފްތިތާހުކުރުމަށް މިރޭ އެ ހޮސްޕިޓަލުގައި ބޭއްވި ރަސްމިއްޔާތެއްގައި ރައީސް ވިދާޅުވީ، މި ތިން އަހަރުތެރޭ ރާއްޖޭގެ ސިއްހީ ދާއިރާއަށް އައިސްފައިވަނީ ތަފާތު ހެޔޮ ބަދަލުތަކެއް ކަމަށެވެ. ހާއްސަކޮށް ސަރުކާރުގެ މައި ހޮސްޕިޓަލް، އައިޖީއެމްއެޗަށް އައިސްފައިވަނީ ހައިރާންކުރުވަނިވި ބޮޑު ބަދަލެއް ކަމަށާއި، މިއަދު ތައާރަފްކުރެވުނު ހިދުމަތްތަކާއި އައު ލޯގޯއާ އެކު ހޮސްޕިޓަލުގެ އާ ތާރީހެއް އަލުން ފެށިގެން ހިނގައްޖެ ކަމަށް ރައީސް ވިދާޅުވި އެވެ.

ރައީސް ވިދާޅުވީ، އައިޖީއެމްއެޗަށް މި ތިން އަހަރު ތެރޭ އައި ތަރައްގީއަށް ވިސްނާލުމުން، ހޮސްޕިޓަލްގެ އާ ގަވާނިން ބޯޑުގެ މެންބަރުން ސިއްހީ ދާއިރާއަށް އިހުތިރާމްކުރާ މިންވަރު ހާމަވެއްޖެ ކަމަށެވެ. އަދި ސަރުކާރުން ސިއްހީ ދާއިރާގެ އިންވެސްޓްމަންޓް އެތައް ގުނައެއް ބޮޑު ކުރާނެ ކަމަށް ވެސް ވިދާޅުވި އެވެ.

"އައިޖީއެމްއެޗްގެ ގަވާނާއާ ޑެޕިއުޓީ ގަވަރުނަރާއި ދެން ތިއްބެވި އެހެން މެންބަރުންނާއެކު އަޅުގަނޑުމެންނަށް މި ފެންނަނީ، މެނޭޖްމަންޓުން މިދާއިރާއަށް ހުރި އަޅާލުންތެރިކަން. މި މަސައްކަތަކީ އަމިއްލަ މަސައްކަތްކަން ދެކިގެން މަސައްކަތް ކުރާނަމަ މި ނަތީޖާ މި ސްޕީޑުގައި ގެނެވޭނެ، އެއާއެކެ މަސައްކަތްކުރައްވާ ޑޮކްޓަރުންނާއި އެހެން ވެސް ސްޓާފުންނަށް ހިތްހަމަޖެހިގެން މަސައްކަތްކުރެވޭނީ މެނޭޖްމަންޓްގައި އެ ހަކަތަ ހުރެގެން،" ރައީސް ވިދާޅުވި އެވެ.

ސިއްހީ ދާއިރާއާ މެދު ސަރުކާރުން ގެންގުޅޭ ތަސައްވުރަށް އިޝާރާތްކުރައްވައި ރައީސް ވިދާޅުވީ، މިއަހަރުގެ ބަޖެޓުގައިވެސް ސިއްހީ ދާއިރާއަށް އެކަނި 3.3 ބިލިއަން ރުފިޔާގެ ބަޖެޓެއް ކަނޑައަޅާފައިވާ ކަމަށެވެ. އޭގެ ތެރެއިން ދެ ބިލިއަން އައިޖީއެމްއެޗް ތަރައްގީކުރުމަށް ހަމަޖައްސާފައިވާއިރު، އެ ހަރަދުތަކުގެ މަންފާ ރާއްޖޭގެ ރައްޔިތުންނަށް މުޅި އުމުރަށް ލިބިގެންދާނެ ކަމަށެވެ.

"މި ދާއިރާއަށް ކުރެވޭ ކޮންމެ ހޭދައަކީ އަޅުގަނޑު ދެކޭ ގޮތުގައި ޕޮޒިޓިވް އިންވެސްޓްމަންޓެއް. އެއިން ނަތީޖާ ނެރޭ، އަދި މީހުންގެ ލާބައަށް، މީހުންގެ ސިއްހަތަށް އެކަނި ބެލިކަމަށް ވިޔަސް ދެމިގެންދާނެ ފައިދާތަކެއް. އާސަންދައަށް ބެލި ނަމަވެސް ނުވަތަ ބޭރަށް ފަރުވާއަށްދާ މީހުން އުފުލަންޖެހޭ ބުރަ އާއި ތަކުލީފަށް ބެލި ނަމަވެސް އަޅުގަނޑުމެންގެ އަމިއްލަ ރަށުން މިފަދަ ހިދުމަތްތައް ލިބުމުން ވަރަށް ބޮޑު ލުއިތަކެއް ލިބިގެން މި އަންނަނީ،" ރައީސް ވިދާޅުވި އެވެ.

އެމަނިކުފާނު ވިދާޅުވި ގޮތުގައި އައިޖީއެމްއެޗަށް ފަރުވާގެ ހިދުމަތް ތައާރަފްކުރަމުންދަނީ ރާއްޖެއިން އެންމެ ގިނައިން މީހުން ބޭރަށްދާންޖެހޭ މައްސަލަތަކަށް ބެލުމަށްފަހު ކަމަށެވެ. އެހެންކަމުން އައިޖީއެމްއެޗާ ދޭތެރޭގައި ކުރެވެނީ ވަރަށް ފޮނި އިންތިޒާރެއް ކަމަށާއި އަންނަ އަހަރުވެސް ރާއްޖޭގެ ސިއްހީ ދާއިރާއަށް އާ އެތައް ހިދުމަތެއް ތައާރަފްވެގެންދާނެ ކަމަށް ރައީސް ޔާމީން ވިދާޅުވި އެވެ.

"25 ބުރގެ އިމާރާތް ނިމެންވާއިރަށް އިމާރާތަށް ބޭނުންވާ ހުރިހާ މެޝިނަރީއާ އިކުއިޕްމަންޓް ހޯދުމަށް އަޅުގަނޑުމެން ބަޖެޓުގައި ޖަހައިފީމު. އެ އިމާރާތް ނިމެންވާއިރަށް ހަމައެކަނި ޑައިގްނޯސްޓިކެއް ނޫން. ދެން ބޭނުންވާ ހުރިހާ ވަސީލަތެއް ވެސް ހަމަވެގެންދާނެ. ހަމަ އެހެންމެ އާ ޑިޕާޓްމަންޓްތަކެއް ވެސް އުފެދިގެންދާނެ. ފުއްޕާމޭގެ ބަލިތަކާބެހޭ ކަންތައްތަކަށް ހާއްސަ ޑިޕާޓްމަންޓްވެސް އުފެދިގެން މިހާރު މިދަނީ،" ރައީސް ވިދާޅުވި އެވެ.

މި ސަރަހައްދުގެ އެންމެ ފެންވަރު ރަނގަޅު ހޮސްޕިޓަލްތަކުގެ ތެރޭގައި އައިޖީއެމްއެޗްގެ ހިމެނުމަށް ސަރުކާރުން ކެނޑިނޭޅި މަސައްކަތްކުރާނެ ކަމުގެ ޔަގީންކަން ރައީސް ވަނީ ދެއްވާފަ އެވެ. ރައީސް ވިދާޅުވީ ސަރުކާރުގެ މައި ހޮސްޕިޓަލް ތަރައްގީ ވުމަކީ އާންމު ރައްޔިތުންގެ ދުޅަހެޔޮ ކަމަށް ވެސް ކޮންމެހެން މުހިންމު ކަމަށެވެ. ރައީސް ވިދާޅުވީ ކޮންމެ މީހަކީ ވެސް ބަލިވާނެ މީހެއް ކަމަށާއި އެފަދަ ހާލަތެއްގައި ވެސް ރަނގަޅު ސިއްހީ ފަރުވާއެއް އަމިއްލަ ގައުމުން ލިބެން ޖެހޭނެ ކަމަށެވެ.

ރައީސް ވަނީ ސިއްހީ ދާއިރާގައި މަސައްކަތް ކުރާ ފަރާތްތަކުގެ ތައުލީމާއި ތަޖުރިބާ އަދި އިނާޔަތްތަކާއި އެލަވަންސްތައް ރަނގަޅު ކުރުމަށް ސަރުކާރުން މަސައްކަތް ކުރާނެ ކަމުގެ ޔަގީންކަން ދެއްވައިފަ އެވެ. އަދި އެ ދާއިރާގެ ހުރިހާ ފަރާތްތަކުން ވެސް ގައުމީ ހިދުމަތެއްގެ ގޮތުގައި ދެކިގެން އާންމުންނަށް ހިދުމަތް ފޯރުކޮށް ދިނުމަށް ރައީސް ވަނީ ގޮވާލައްވައިފަ އެވެ.