ހުޅުމާލޭގައި ސަރުކާރުގެ މުވައްޒަފުންނަށް އަމާޒުކޮށްގެން އިމާރާތްކުރުމަށް ނިންމާފައިވާ 2500 ފްލެޓްގެ ބޮޑު ބައެއް ހާއްސަ ކުރާނީ ސިއްހީ ދާއިރާގެ މުވައްޒަފުންނަށް ކަމަށް ރައީސް އަބްދުﷲ ޔާމީން ވިދާޅުވެއްޖެ އެވެ.
އައިޖީއެމްއެޗަށް މުހިއްމު މަސައްކަތްތަކެއް ކޮށްދީފައިވާ އެ ހޮސްޕިޓަލްގެ 17 މުވައްޒަފަކަށް މިރޭ ސަރުކާރުން ވަނީ ފްލެޓް ދީފަ އެވެ. އެ ފަރާތްތަކަށް ފްލެޓް ދީފައިވަނީ ލައިފްޓައިމް އެޗީވްމަންޓެއްގެ ގޮތުގައި، ހަދިޔާއެއްގެ ގޮތުންނެވެ.
ރައީސް މިރޭ ވިދާޅުވީ، ހުޅުމާލޭގައި އަލަށް އިމާރާތްކުރާ 2500 ފްލެޓްގެ ތެރޭގައި ސިފަންނާއި ފުލުހުންނަށް ދޭ ފްލެޓްތަކެއް އިތުރަށް އެ ފްލެޓްތަކުގެ ބޮޑުބައި ދިނުމަށް ހަމަޖެހިފައިވަނީ ސިއްހީ ދާއިރާގެ މުވައްޒަފުންނަށް ކަމަށެވެ. އޭގެ ތެރޭގައި ޑޮކްޓަރުންނާއި ނަރުހުންވެސް ހިމެނޭނެ ކަމަށާއި އެގޮތަށް ނިންމަވާފައިވަނީ، ސިއްހީދާއިރާއަށް ސަރުކާރުންދޭ އަޅާލުން ކުރިއަށްވުރެ އިތުރުކޮށް ދާއިރާގެ އުފެއްދުންތެރިކަން އިތުރުކުރުމުގެ ގޮތުން ކަމަށް ރައީސް ވިދާޅުވި އެވެ.
ބޭނުންވާ ވަރަށް ނަރުހުންނާއި ޑޮކްޓަރުން ނުލިބޭކަމީ ރާއްޖޭގެ ސިއްހީ ދާއިރާއަށް މިވަގުތު ދިމާވެފައިވާ އެންމެ ބޮޑު އެއް ގޮންޖެހުމުގެ ގޮތުގައި ސިފަކުރައްވައި ރައީސް ވަނީ ސިއްހީ ދާއިރާއަށް ހިދުމަތްކުރައްވާ ބޭފުޅުން ސަރުކާރުގެ ސެންޓަރުތަކުގައި ހިދުމަތްކުރުމަށް އިލްތިމާސްކުރައްވާފަ އެވެ.
"އެއްއަތުން އަޅުގަނޑުމެން މަރުހަބާކިޔަމުން ޕްރައިވެޓް ހޮސްޕިޓަލްތަކަށް ޖާގަދޭއިރު، އަނެއް އަތުން މަނާކުރަން މިޖެހެނީ އަޅުގަނޑުމެންނާ އެކީ ހިދުމަތްކުރާ މުވައްޒަފުން އަޅުގަނޑުމެން ދޫކޮށްފައި ދާތީ. އެހެން ނަމަވެސް މިކަން އޮންނާނީ ވެސް މިހެން، އަޅުގަނޑުމެން މިދަނީ މިކަމަށް އޮތް އެންމެ ރަނގަޅު ހައްލަކީ ކޮބައިތޯ ވިސްނަމުން،" ރައީސް ވިދާޅުވި އެވެ.
ރައީސް ވިދާޅުވީ ފާމަސިސްޓުން ތައްޔާރުކުރުމަށް މަސައްކަތްކުރި ގޮތަށް ޑޮކްޓަރުންނާއި ނަރުހުން ތައްޔާރުކުރުމަށްވެސް ވަރަށް ހަލުވި މަސައްކަތްތަކެއް ކުރިއަށް އޮތްތަނުގައި ރޭވިގެންދާނެ ކަމަށެވެ. ރައީސް ވިދާޅުވި ސަރުކާރުގެ ހަރަދުގައި މެޑިސިން ކިޔަވާ ފަރާތްތަކުން ބޮންޑް ހަމަކޮށްފައި އަމިއްލަ ތަންތަނުގެ ހިދުމަތަށް ދިނުމަކީ އެންމެ އެދެވޭ ގޮތް ނޫން ކަމަށެވެ. ރައީސް ވިދާޅުވި ގޮތުގައި ދައުލަތުގެ ބަޖެޓުން އެ ފަރާތްތަކުގެ ކިޔެވުމަށް ކުރާ ހަރަދަކީ ފަސް އަހަރުން ނޫނީ އެއަށް ވުރެ ދިގު މުއްދަތަކުން ވެސް އަދާ ކުރެވޭނެ އަގެއް ނޫނެވެ. އެހެން ކަމުން ސަރުކާރުގެ ސިއްހީ ދާއިރާއަށް ހިދުމަތް ކުރުމަށް އިސްކަން ދިނުމަށް ރައީސް ގޮވާލެއްވި އެވެ.