ރާއްޖޭގެ ޑޮކްޓަރުންނާއި ނަރުހުންނަށް ކެންސަރު ބައްޔަށް ފަރުވާކުރުމާ ގުޅޭ ތަމްރީން ދީ ކެންސަރު ބައްޔާ ގުޅޭ އެކި ކަންކަމުގައި ރާއްޖެއަށް އެހީތެރިކަން ފޯރުކޮށްދިނުމަށް ޕާކިސްތާނުގެ ޝޯކަތު ނައުމް ހޮސްޕިޓަލް އިން ހެލްތު މިނިސްޓްރީއާ އެކު މިއަދު އެއްބަސްވެއްޖެ އެވެ.
މިއަދު ހެލްތު މިނިސްޓްރީގައި ބޭއްވި ރަސްމިއްޔާތެއްގައި އެ އެއްބަސްވުމުގައި ސޮއިކުރެއްވީ ޝައުކަތު ނައުމް ހޮސްޕިޓަލްގެ ފަރާތުން ރާއްޖެއަށް ކަނޑައަޅުއްވާފައި ހުންނަވާ ސަފީރު ވައިސް އެޑްމިރަލް ރިޓަޔާޑް ސައިދު ހަވަރް އަލީ ޝާހެވެ. ހެލްތު މިނިސްޓްރީގެ ފަރާތުން މިނިސްޓަރު އަބްދުﷲ ނާޒިމް އެވެ.
މިއަދު ސޮއިކުރި އެއްބަސްވުމުގެ ދަށުން ކެންސަރަށް ރާއްޖެއިން ފަރުވާހޯދާ ބަލިމީހުންނަށް ފަރުވާދިނުމާއި، އެބައްޔަށް ފަރުވާކުރުމުގައި ރާއްޖޭގައި މަސައްކަތްކުރާ ޑޮކްޓަރުންނާއި ނަރުހުންނަށް އިތުރު ތަމްރީން ދޭން ވަނީ ހަމަޖެހިފަ އެވެ. އަގި ރާއްޖޭގައި ތިބި ކެންސަރު ބަލި މީހުންގެ ރަޖިސްޓްރީއެއް އެކުލަވާލުމަށްވެސް އެ ހޮސްޕިޓަލުން އެހީތެރިވެދޭނެ އެވެ.
އެއްބަސްވުމުގައި ސޮއިކުރެއްވުމަށްފަހު މިނިސްޓަރު ނާޒިމް ވިދާޅުވީ، ޕާކިސްތާން ސަރުކާރަކީ ރާޢްޖޭގެ ސިއްހީ ދާއިރާއަށް އެހީ ފޯރުކޮށްދިނުމުގެ ދިގު މާޒީއެއް ގޮތް ގައުމެއް ކަމަށެވެ. ޕާކިސްތާން ސަރުކާރުން އިސްނަގައިގެން މިއަދު ސޮއިކުރި އެއްބަސްވުމަކީވެސް އެ ގައުމުން ރާއްޖޭގެ ސިއްހީ ދާއިރާގެ ކުރިއެރުމަށް ވިސްނާކަން ހާމަކޮށްދޭ ކަމެއް ކަމަށާއި، މިއީ ރާއްޖެއާ ޕާކިސްތާނުގެ ގުޅުން ދުވަހެއް ދުވަހަކަށް ހަރުދަނާ ވަމުންދާކަން ހާމަވާ ކަމެއް ކަމަށެވެ.
ޕާކިސްތާނަކީ ރާއްޖޭގެ ޑޮކްޓަރުންނަށް ގިނަ އަދަދެއްގެ ތަމްރީން ފުރުސަތު މީގެ ކުރިންވެސް ފޯރުކޮށްދީފައިވާ ގައުމެކެވެ. އެގޮތުން 2014 ވަނަ އަހަރުވެސް އެ ގައުމުން ވަނީ ހުޅުމާޅެ ހޮސްޕިޓަލުގައި ޑެންޓަލް ޗެއާއެއް ބަހައްޓައިދީފަ އެވެ. އަދި ޑޮކްޓަރުންނާއި ފާމަސިސްޓުންނަށްވެސް ގިނަ އަދަދެއްގެ ސްކޮލާޝިޕް ފުރުސަތުތަކެއް ފަހިކޮށްދީފަ އެވެ.